Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 113 Hüküm no: 82 Orijinal metin no: [25a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın bazı ev eşyalarını eşi Ayşe’ye satması Husûs ile eşyâ mübâya‘ası, hibe 250 guruş ibrâ. Husûs-ı âti’l-beyânın mahâllinde ketb ü tahrîri için sabv-ı şer‘-i enverden bi’l-iltimâs irsâl olunan Mevlana es-Seyyid Numan Efendi mahmiye-i İstanbul’da [Ho]ca Üveys mahallesinde vâki‘ Âişe bt. Osman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde mezbûrenin zevci olup menzil-i mezkûrda sâkin İbrahim Ağa b. Memiş meclis-i ma‘kūd-ı mezkûrda zâtı mu‘arrefe Âişe Hatun mahzarında ikrâr-ı tam ve takrîr-i kelâm edip eşyâ-i memlûkemden yeşile kaplı bir nâfe kürk ve bir geziye kaplı nîmten kürk ve dört entari ve raziye? ve bir çift piştov ve iki Acem şalı ve dört sahan ma‘a kapak ve iki tencere ma‘a kapak tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Âişe Hatun’a iki yüz elli guruşa bey‘ ü temlik ve yine yedimde malım olan altı sîm zarfımı dahi zevcem mezbûreye hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki yüz elli guruş mutâlebesine ve hukūk-ı zevciyete müte‘allika da‘vâdan zevcim mezbûre Âişe Hatun’un zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi. Fîmâ-ba‘d eşyâ-yı muharrere-i mezkûre zevcem mezbûre Âişe Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ zevcem mezbûre Âişe Hatun’un malı olup benim yedimle İştib kazâsında sâkin a‘yân Mahmud Ağa’ya ikrâz eylediği bin yüz seksen dört guruş ve Tatar Ahmed Ağa’ya kezâlik benim yedimle ikrâz eylediği iki yüz guruş ve işbu menzil-i mezkûrda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u zevcim mezbûr Âişe Hatun’un malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le [25b] meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 10 Ra sene [1]242 Şühûdü’l-hâl: Müezzin Halil Efendi b. İsmail, Muhzır Mehmed Çelebi, es-Seyyid Ali Ağa b. Ali, Çukadâr Mustafa Ağa, Ömer Ağa b. Osman.