Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 115 Hüküm no: 84 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma bt. Halil ile oğlu Seyyid Hüseyin’in kendilerine intikal eden arsanın üzerindeki enkazı satmaları arsanın bir kısmını da hibe etmeleri Arsa mübâya‘ası, bir mikdârı meccânen, 200 guruş Mahmiye-i İstanbul’da Kumkapı kurbünde Dülbendçi Hüsameddin mahallesinde sâkin iken bundan akdem fevt olan Mustafa b. Ali’nin verâseti zevce-i menkûha-i metrûkesi Esma bt. Halil ile sulbî kebîr oğlu es-Seyyid Hüseyin’e inhisârı tahakkukundan sonra zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Esma Hatun ile merkūm Hüseyin meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Hadice bt. Hüseyin nâm hatun mahzarında bi’l-verâse ikrâr-ı tam ve takrîr-i kelâm edip mezbûr Esma Hatun mahalle-i mezbûrede vâki‘ Hafız Lütfullah ve Yorgânî Said Ağa ve Yorgânî el-Hâc Salih Ağa menzilleri ve taraf-ı râbi‘i tarîk-i âm ile mahdûd Sîmkeş el-Hâc Musa Vakfı’na senede altmış akçe mukāta‘a-yı kadîmeli bir kıt‘a arsanın nısfı benim ve nısf-ı âharı mûrisimiz zevcim müteveffâ-yı mezbûrun hayatında ile’l-vefât bâ-temessük-i mütevellî taht-ı tasarrufumuzda ve üzerinde mevcûde bi’l-cümle enkāz-ı mevcûdesinin dahi kezâlik nısfı benim ve nısf-ı âharı zevcim mezbûrun kezâlik hayatında mülk ve hakkı olup ba‘de vefâtihî arsa-i mezkûrenin nısfı benimle oğlum mezbûra ve enkāz-ı mevcûdesinin dahi sümünü bana ve selâse-i erba‘ı oğlu mezbûra mevrûs olmağla biz arsa-i mezkûrenin yüz yirmi bir zirâ‘ mahâllini ifrâz ve alâmet-i fâsıla vaz‘ıyla imtiyâz birle üzerinde mevcûde bi’l-cümle enkāz-ı ma‘lûmesi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Hadice Hatun’a iki yüz guruşa bey‘ ü temlik ve zikr olunan yüz yirmi bir zirâ‘ arsası dahi bâ-ma‘rifet-i mütevellî mezbûre Hadice Hatun’a meccânen ferâğ ve tefvîz eylediğimizde ol dahi ber-vech-i muharrer iştirâ ve temellük ve tefevvüz ve teslîm ve kabz ü kabûl eyledikden sonra semeni olan meblağ-ı mezbûr iki yüz guruşu müşteri-yi mezbûre bize def‘ ü teslîm biz dahi yedinden tamamen ahz ü kabz eyledik, fîmâ-ba‘d enkāz-ı mezkûrenin ma‘lûmü’l-mikdârı mezbûre Hadice Hatun’un mülk-i müşterâsı ve hakk-ı sırfı ve zikr olunan mukāta‘alu arsanın dahi yüz yirmi bir zirâ‘ı dâhil-i havza-i tasarrufu olup <> bizim alâka ve medhalimiz kalmamışdır dediklerinde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 2 Ra sene [1]242 Şühûdü’l-hâl: Muhzır Emin Çelebi, Muhzır Fettah Çelebi