Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 116 Hüküm no: 85 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Seyyid Mehmed’in eşi Mehmed Emin’den muhâlaa usulüyle boşanması Muhâla‘a hücceti Mahmiye-i İstanbul’da Karagümrük kurbünde Zincirlikuyu’da sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Hadice bt. es-Seyyid Mehmed nâm hatun meclis-i şer‘-i şerîf-i enverde zevc-i muhâlı‘ı işbu bâ‘isü’l-vesîka Mehmed Emin b. Osman mahzarında ikrâr-ı tam ve takrîr-i kelâm edip mezbûr Mehmed Emin zevc-i dâhilim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan iki yüz bir guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetden işbu târih-i kitâba gelince sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâ ve kâffe-i mutâlebâtdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 10 Ra sene [1]242 Şühûdü’l-hâl: Ebûbekir Çelebi el-muhzır, Feyzullah Çelebi el-muhzır, Mehmed Emin Çelebi el-muhzır