Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 116 Hüküm no: 86 Orijinal metin no: [25b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asakir-i Mansure-i Muhammediye’ye mensup İbrahim b. Halil’in vârislerinin kendilerine intikal eden terekeyi Kâtip Mehmed Salih Efendi’den teslim almaları Ahz, kabz, ibrâ Fi’l-asl medîne-i Üsküdar’a muzâfe Gekbûze (Gebze) kasabası ahâlisinden olup İstanbul’da sâkin iken bundan akdem fevt olan Asâkir-i Mansûre-i Muhammediye’den İbrahim b. Halil b. Ahmed’in verâseti anası Âişe bt. Musa ile li-ebeveyn er karındaşları Salih ve Mehmed ve li-ebeveyn kız karındaşları Emine ve Fatıma’ya inhisârı tahakkukundan sonra mezbûrûn Âişe ve Salih ve Mehmed ve Emine ve Fatıma taraflarından husûs-ı âti’l-beyânda vekîl olduğu bir kıt‘a isbât-ı vekâlet hücceti nâtıka olduğu üzere Mustafa b. Ali ve Halil b. Ârif şehâdetleriyle sâbit olan Veliyüddin b. Musa meclis-i şer‘-i şerîf-i enverde tereke-i müteveffâ-yı mezbûre bi’l-emâne vaz‘-ı yedi mütehakkık olan işbu bâ‘isü’l-vesîka Asâkir-i Mansûre-i Muhammediye kâtiblerinden Mehmed Salih Efendi b. Hafız Hasan mahzarında bi’l-vekâle ikrâr-ı tam ve takrîr-i kelâm edip mezbûrûnun mûrisleri müteveffâ-yı mezbûrun hîn-i vefâtında yanında mevcûde tahrîr ve bey‘ olunan terekesi esmânından ba‘de ihrâci’l-mesârif-i lâzıme sahhu’l-bâkī mezbûr Mehmed Salih Efendi’nin bi’l-emâne makbûzu olan altmış altı guruş on beş parayı mezbûr Mehmed Salih Efendi bana def‘ ü teslîm ben dahi yedinden bi’l-vekâle tamamen ahz ü kabz eyledim. min-ba‘d meblağ-ı mezbûrdan mezbûr Mehmed Salih Efendi zimmetinde bir akçe ve bir habbe bâkī kalmamağla husûs-ı mezkûra müte‘allika da‘vâdan mezbûr Mehmed Salih Efendi ile Başkâtib Yekta Efendi’nin zimmetlerini kabûlü hâvî bi’l-vekâle ibrâ ve iskāt eyledim dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 12 Ra sene [1]242 Şühûdü’l-hâl: Muhzır Mehmed Çelebi, Muhzır Hüseyin Çelebi