Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 117 Hüküm no: 87 Orijinal metin no: [25b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Usta’nın Mustafa Alemdar’da olan alacağını tahsil ve rehninde olan Tığcı dükkânı âletlerini iade etmesi Hâmiş hücceti Hâmişine sebt olunan hüccetde mezkûrü’l-ism İbrahim Usta b. Ali meclis-i şer‘-i şerîf-i enverde kezâlik derûn-ı hüccetde mezkûrü’l-ism işbu bâ‘isü’l-vesîka Mustafa Alemdar b. Mustafa mahzarında ikrâr-ı tam ve takrîr-i kelâm edip derûn-ı hüccetde tafsîl ü beyân olunduğu üzere mezbûr Mustafa Alemdar İstanbul’da Mercan Çarşısı kurbünde vâki‘ bir bâb tığcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmesi sûret-i kat‘iyyede bin sekiz yüz guruşa bana bey‘ ü temlik ve teslîm eylediğinde ben dahi ber-vech-i muharrer iştirâ ve kabz ü kabûl eylemiş idim. <> Lâkin hakīkatde meblağ-ı mezbûr bin sekiz yüz guruş mezbûr Mustafa Ağa’nın bana zimmetinde deyni ve âlât-ı lâzıme-i mezkûresi dahi mukābelesinde rehin olmağla mezbûr Mustafa Ağa deyni olan meblağ-ı mezbûr bin sekiz yüz guruşu bana def‘ ü teslîm ben dahi yedinden tamamen ahz ü kabz ve rehhân-ı mezkûreyi rehniyetden fekk ve kendüye teslîm edip min-ba‘d meblağ-ı mezbûrdan mezbûr Mustafa Usta zimmetinde bir akçe ve bir habbe bâkī kalmayıp ve âlât-ı muharrere-i mezkûre ke’l-evvel mezbûr Mustafa Usta’nın emvâl-i mahzı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 6 Ra sene [1]242 Şühûdü’l-hâl: Muhzır Ali Çelebi, Muhzır Hüseyin Çelebi, Muhzır Emin Çelebi.