Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 117 Hüküm no: 88 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Dede’nin kardeşi Şeyh Sadeddin’i verâset hususunda vekil tayin etmesi Vekâlet Hücceti <> Vilâyet-i Anadolu’da Hudâvendigâr Sancağında Yenişehir-i Bursa kazâsında Câmi‘-i kebîr mahallesinde sâkin iken bundan akdem fevt olan eş-Şeyh Ali b. İbrahim b. Abdullah’ın verâseti zevce-i menkûha-i metrûkesi İsmihan bt. Süleyman nâm hatun ile li-ebin er karındaşları İsmail Dede ve eş-Şeyh Sadeddin ve li-ebin kız karındaşları Münire ve Safiye ve Kâmile’ye inhisârı tahakkukundan sonra merkūm İsmail Dede meclis-i şer‘-i şerîf-i enverde karındaşı işbu bâ‘isü’l-vesîka mezbûr eş-Şeyh Sadeddin Efendi mahzarında bi’l-verâse ikrâr-ı tam ve takrîr-i kelâm edip mûrisim karındaşım müteveffâ-yı mezbûrun hîn-i vefâtında yanında mevcûde bi’l-cümle terekesini zevcesi mezbûre İsmihan Hatun bi’l-verâse ve bi’l-emâne kabz ü vaz‘ etmekle tereke-i müteveffâ-yı mezbûrdan benim hisse-i irsiyemi mezbûre İsmihan Hatun’dan mahâllinde taleb ve da‘vâ ve ahz ü kabza ve makbûzunu bana îsâle ve teslîme ve sâir kâffe-i umûrumu idâre ve rü’yete ve husûs-ı mezkûrlar mütevakkıf olduğu umûrun küllîsine tarafımdan karındaşım mezbûr eş-Şeyh Sadeddin Efendi’yi vekîl ve nâib-i menâb nasb ü ta‘yîn eyledim dedikde ol dahi vekâlet-i mezkûreyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu] Fî 13 Ra sene [1]242 Şühûdü’l-hâl: Muhzır Ali Çelebi, İsmail b. Hasan, Osman b. Halil, Muhzır Emin Çelebi.