Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 118 Hüküm no: 89 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Tarandafil ve Mıgırdıç v. Avram’ın kendi yerlerine şahitlik etmek üzere Mehmed Ağa ve Mihalaki’yi vekil tayin etmeleri Tahmîlü’ş-şehâde hücceti Zikri âtî husûsa şâhideyi’l-asıl olup mahmiye-i İstanbul’da Zindankapısı dâhilinde tütüncü dükkânında sâkin ve lede’t-tezkiye adl ve makbûlü’ş-şehâde idükleri ihbâr olunan Duhânî Tarandafil v. Yorgi ve mahmiye-i mezbûrede Uzunçarşı’da Kādı Hanı’nda mütemekkin Mıgırdıç v. Aram nâm zimmîler meclis-i şer‘-i şerîf-i enverde mahmiye-i mezbûrede Kürkçü Hanı’nda mütemekkin Nikola v. Tanaş zimmî hâzır olduğu [hâlde] ber-vech-i âtî şâhideyi’l-fer‘ olup mahmiye-i mezbûrede Sultan Süleyman Han Câmi‘-i şerîfi civârında sâkin işbu bâ‘iseyü’l-vesîka Mehmed Ağa b. Ahmed ve Mihalaki v. İsterati mahzarında her biri ikrâr-ı tam ve takrîr-i kelâm edip hâzır-ı mersûm Nikola v. Tanaş zimmînin yedinde olup bin iki yüz otuz sekiz senesi Zilhiccetü’ş-şerîfesi târihiyle müverrah bir kıt‘a temessük mantûkunca sevâhil-i bahr-ı sefîdden Gelibolu kasabası ahâlisinden olup Kal‘a-i Sultâniye’de sâkin Hekimoğlu Manol v. Yani zimmî hâzır-ı mersûm Nikola zimmî yedinden on iki bin beş yüz yetmiş dokuz guruş iktirâz ve kabz ve meblağ-ı mezbûr zimmetinde cihet-i karzdan hâzır-ı mersûma sahîhan deyni olduğunu mahmiye-i mezbûrede Duhâncılar Kethudâsı el-Hâc Mustafa Ağa’nın mağazasında bizim huzûrumuzda ikrâr edip târih-i mezkûrda zikr olunan temessükü hâzır-ı mersûmun yedine i‘tâ eylediği bizim ma‘lûmumuzdur, bizler bu husûsa bu vech üzere şâhidleriz şehâdet dahi ederiz. Lâkin bizim için Âsitâne-i aliyye’den müddet-i sefer-ba‘îd olan Kal‘a-i mezbûreye varıp edâ-yı şehâdet-i şer‘iye etmek müte‘assir olmağla her birimiz lisânımızdan mahâllinde şehâdet ettik deyü husûs-ı mezkûrda olan şehâdetimizi her birimiz mezbûrândan her ikisine tahmîl ve şehâdete emir eylediğimizde onlar dahi tahammül ve kabûl ve mahâllinde şehâdetü ale’ş-şehâde tarîki vechi üzere edâ-yı şehâdete ta‘ahhüd eylediler dediklerinde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 15 Ra sene [1]242 Şühûdü’l-hâl: Ebûbekir Çelebi el-muhzır, Ali Çelebi el-muhzır