Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 119 Hüküm no: 90 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın İbrahim Usta’da olan alacağını tahsil ve elinde rehin olan çakmakçı dükkânı gediğini iade etmesi Hâmiş hücceti Hâmişine sebt olunan hüccetde mezkûretü’l-ism zâtı mu‘arrefe Fatıma bt. Mustafa nâm hatun meclis-i şer‘-i şerîf-i enverde kezâlik derûn-ı hüccetde mezkûrü’l-ism işbu bâ‘isü’l-vesîka İbrahim Usta b. Ali mahzarında ikrâr-ı tam ve takrîr-i kelâm edip derûn-ı hüccetde tafsîl ü beyân olunduğu üzere mezbûr İbrahim Usta İstanbul’da Vâlide Hanı kurbünde vâki‘ bir bâb çakmakçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmesi sûret-i kat‘iyyede bin beş yüz guruşa bana bey‘ ü temlik ve teslîm eylediğinde ben dahi ber-vech-i muharrer iştirâ ve kabz ü kabûl etmiş idim. Lâkin hakīkatde meblağ-ı mezbûr bin beş yüz guruş mezbûr İbrahim Usta’nın bana zimmetinde deyni <> ve âlât-ı lâzıme-i mezkûre dahi mukābelesinde rehin olmağla mezbûr İbrahim Usta deyni olan meblağ-ı mezbûr bin beş yüz guruşu bana def‘ ü teslîm ben dahi yedinden tamamen ahz ü kabz ve rihân-ı mezkûreyi rehniyetden fekk ve kendüye teslîm edip min-ba‘d meblağ-ı mezbûrdan mezbûr İbrahim Usta zimmetinde bir akçe ve bir habbe bâkī kalmayıp ve âlât-ı muharrere-i mezkûre ke’l-evvel mezbûr İbrahim Usta’nın emvâl-i mahzı ve hakk-ı sırfı olup benim kat‘a alâka ve medhalim kalmamışdır dedikde, gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ra sene [1]242 Şühûdü’l-hâl: Muhzır Hüseyin Çelebi, Muhzır Emin Çelebi. Muhzır Ali Çelebi.