Bab Mahkemesi 54 Numaralı Sicil (H. 1102 / M. 1691) cilt: 20, sayfa: 124 Hüküm no: 107 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Paşa b. Mustafa Efendi’nin Receb Çelebi b. Hüseyin’e olan borcu karşılığında menzilini rehin vermesi Mahrûse-i Galata muzâfâtından kasaba-i Kasımpaşa’da Kadı mahallesinde sâkin olup sâbıkan Rodos muhâfızı olan emîrü’l-ümerâ’i’l-kirâm kebîrü’l-küberâ’i’l-fihâm sa‘âdetlü Ömer Paşa b. el-merhûm Zindân kâtibi Mustafa Efendi tarafından husûs-ı âti’l-beyâna vekîl olduğu etbâ‘ından Mehmed Ağa b. Receb ve Mehmed Bey b. Ali şehâdetleriyle şer‘an sâbit olan el-Hâc İbrahim Ağa b. el-Hâc Mustafa meclis-i şer‘-i şerîf-i enverde, işbu bâ‘isü’l-kitâb Şumârî Receb Çelebi b. Hüseyin mahzarında ikrâr-ı tâm ve takrîr-i kelâm edip, müvekkil-i müşârün-ileyh Ömer Paşa târih-i kitâbdan bir gün mukaddem mezbûr Receb Çelebi yedinden beş yüz aded yaldız altını iktirâz ve kabz edip, hâlâ meblağ-ı mezbûr beş yüz yaldız altını cihet-i karz-ı şer‘îden zimmetinde merkūm Receb Çelebi’ye vâcibü’l-edâ ve lâzımü’l-kazâ deyni olmağla, meblağ-ı mezbûr mukābelesinde mahalle-i mezbûrede vâki‘ bir tarafdan Medîne-i münevvere Vakfı olup Mücella Hâtun tasarrufunda olan menzil ve üç tarafdan tarîk-i âmla mahdûd dâhiliye ve hâriciyesi büyût-ı adîde ve hamam ve câmekân ve mahzen ve zindân ve ahır ve su hazînesi ve gurfeler ve fıskıye ve fırınlar ve havlu ve bahçeleri müştemil mülk menzilini, fâriğan ani’ş-şevâgil merkūm Receb Çelebi’ye rehin vaz‘ ve teslîm, ol dahi irtihân ve kabz ettiğinden sonra müvekkil-i müşârün-ileyh târih-i mezkûrdan altmış bir gün tamâmına değin edâ-i deyn ve fekk-i rehne ta‘ahhüd ve iltizâm edip ve eğer müddet-i madrûbe tamâmında edâ-i deyn ve fekk-i rehin müyesser olmazsa menzil-i mezbûru semen-i misline âhara bey‘ ve kabz-ı semene ve semeninden deyn-i mezbûr beş yüz yaldız altını ahz u istîfâya ve fazla kalırsa kendiye îsâle ve husûs-ı mezbûr mütevakkıf olduğu umûrun küllîsine dâyin-i merkūm Receb Çelebi’yi vekîl-i nâib-i menâb nasb ve ta‘yîn eyleyip, mezbûr Receb Çelebi dahi vekâlet-i mezbûreyi kabûl eyledim dedikde, gıbbe’l-vicâhî ve tasdîki’ş-şifâhî, mâ hüve’l-vâki‘ bi’t-taleb ve’l-ibtiğā ketb ve imlâ olundu. Fi’l-yevmi’t-tâsi‘ ve’l-ışrîn fî Cemâziyelevvel li sene isneteyn ve mi’e ve elf. Şuhûdü’l-hâl: Sâlih Efendi b. Şaban, Ali Çelebi b. Mustafa, Mustafa Beşe b. Hüseyin, Mustafa Çelebi b. Osman, Mustafa b. Şaban.