Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 120 Hüküm no: 91 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Zehra’nın eşi Seyyid Ahmed Efendi’den muhâlaa usulüyle boşanması Muhâla‘a hücceti Mahmiye-i İstanbul’da Süleymaniye kurbünde Kirazlı Mescid mahallesinde sâkine ve zâtı ta‘rîf-i şer‘î ile mu‘arrefe olan Fâtımatü’z-zehra bt. es-Seyyid Hüseyin nâm hatun meclis-i şer‘-i şerîf-i enverde zevc-i muhâlı‘ı işbu bâ‘isü’l-vesîka Kayseriyeli es-Seyyid Ahmed Efendi b. es-Seyyid Mustafa mahzarında ikrâr-ı tam ve takrîr-i kelâm edip merkūm es-Seyyid Ahmed Efendi zevc-i dâhilim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan beşyüz beş guruş <> mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetden işbu târih-i <> kitâba gelince sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 15 Ra sene [1]242 Şühûdü’l-hâl: Muhzır Ebûbekir Çelebi. Muhzır Abdulfettah Çelebi, Muhzır Mehmed Çelebi, Muhzır Feyzullah Çelebi, Muhzır Ali Çelebi.