Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 120 Hüküm no: 92 Orijinal metin no: [26a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş’un Attar dükkânı gediğini Mübayaacıoğlu Sarraf Abraham’a satması Attâr dükkânı mübâya‘ası, 5000 guruş Mahrûse-i Galata’ya muzâfe kasaba-i Tophâne’de Kadirhâne tekyesi civârında sâkin Mehmed Çavuş b. İsmail meclis-i şer‘-i şerîf-i enverde işbu hâmilü’r-rakīm Mübâya‘acıoğlu Sarrâf Abraham v. Ohannes zimmî tarafından husûs-ı âtîde tasdîka vekîl-i şer‘îsi Mardıros v. Kigork zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Mısır Çarşısı derûnunda <> Tophâneli Ahmed Ağa b. ( ) ve Kırımî Mehmed Said Ağa dükkânları beynlerinde kâin bir bâb Attâr dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye müstakıllen yedimde emvâlim olan iki terâzî ma‘a derâhim ve bir peşkun ve yirmi şişe ve yüz kutu ma‘a sünbül ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müvekkil-i mersûm Abraham zimmîye beş bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş bin guruşu müşteri-yi müvekkil-i mersûm bana def‘ ü teslîm ben dahi yedinden tamamen ahz ü kabz eyledim fîmâ-ba‘d âlât-ı muharrere-i mezkûre müvekkil-i mersûm Abraham zimmînin emvâl-i müşterâsı ve hakk-ı sırfı olup benim kat‘a alâka ve medhalim kalmamışdır dedikde, gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 10 Ra sene [1]242. Şühûdü’l-hâl: Ali Çelebi el-muhzır, Mehmed Çelebi el-muhzır, İbrahim Çelebi el-muhzır.