Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 121 Hüküm no: 93 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Usta’nın Kafesçi ve Doğramacı dükkânları gediğinde olan hissesini Seyyid Eyüb Usta’ya satması Nısf dükkân gediği mübâya‘ası, 200 guruş Mahmiye-i İstanbul’da Musalla kurbünde Muhsine Hatun mahallesinde sâkin Ali Usta b. Mustafa meclis-i şer‘-i şerîf-i enverde işbu bâ‘isü’l-vesîka es-Seyyid Eyüb Usta b. Hüseyin b. Mustafa mahzarında ikrâr-ı tam ve takrîr-i kelâm edip mahmiye-i mezbûrede kolluk ve helvacı dükkânları beynlerinde kâin bir bâb kafesçi ve doğramacı dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin nısfları bâ-hüccet-i şer‘iye benim ve nısf-ı âharları mezbûr es-Seyyid Eyüb Usta’nın yedimizde emvâlimiz olmağla ben âlât-ı muharrere-i mezkûrede ber-vech-i muharrer mâlik olduğum nısf hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Eyüb Usta’ya iki yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki yüz guruşu müşteri-yi mezbûr bana def‘ ü teslîm ben dahi yedinden tamamen ahz ü kabz eyledim. Fîmâ-ba‘d âlât-ı mezkûrenin mecmû‘u mezbûr es-Seyyid Eyüb Usta’nın emvâl-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 13 Ra sene [1]242 Şühûdü’l-hâl: Muhzır Ali Çelebi, Kethudâ Ali Usta, Muhzır Mehmed Çelebi, Mehmed Usta, Veliyüddin Usta, Yiğitbaşı Salih Usta, es-Seyyid İbrahim Usta, Muhzır Ebûbekir Çelebi