Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 122 Hüküm no: 94 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadis v. Artin’in kendisine intikal eden ve Balaşanoğlu İstepan’da olan alacağını tahsil etmesi Ahz, kabz, ibrâ, 4119,5 guruş Vilâyet-i Anadolu’da Erzurum sancağında Bâyezid kasabası re‘âyâsından olup medîne-i Kütahyada misâfiren mütemekkin iken bundan akdem hâlik olan İstefan v. Avadis v. Simyon zimmînin li-ebeveyn ammi oğlu ve hasran verâseti Avadis v. Artin v. Simyon zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Balaşanoğlu İstepan v. Adam zimmî tarafından husûs-ı âti’l-beyânda <> tasdîka vekîl-i şer‘îsi Karabet v. Serkiz dahi muvâcehesinde bi’l-verâse ikrâr-ı tam ve takrîr-i kelâm edip mûrisimiz ammim hâlik-i mersûmun medîne-i İzmir’de mütemekkin mersûm Balaşanoğlu İstepan zimmî zimmetinde sağlığında cihet-i deyn-i şer‘îden dört bin yüz doksan dokuz buçuk guruş alacak hakkı olup kable’l-ahz ve’l-istifâ hâlik ve meblağ-ı mezbûr ancak bana mevrûs olmağla meblağ-ı mezbûru mersûm Balaşanoğlu İstefan zimmî gāib ani’l-meclis Sarrâf Moğsis yediyle bana def‘ ü teslîm ben dahi yedinden tamamen ahz ü kabz eyledim, fîmâ-ba‘d meblağ-ı mezbûrdan gerek sarrâf-ı mersûm ve gerek mersûm Balaşanoğlu İstepan zimmî yedinde bir akçe ve bir habbe hakkım ve alacağım kalmamağla husûs-ı mezkûra müte‘allika âmme-i da‘vâdan gerek sarrâf-ı mersûmun ve gerek mersûm Balaşanoğlu İstepan zimmînin zimmetlerini bi’l-verâse ibrâ ve iskāt eylediğimde onlar dahi ber-vech-i muharrer ibrâ-yı mezkûrumu kabûl eylediler dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 19 Ra sene [1]242 Şühûdü’l-hâl: Muhzır Mehmed Çelebi, Muhzır Fettah Çelebi, Muhzır İsmail Çelebi