Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 122 Hüküm no: 95 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Kigork’un bazı ev eşyasını eşi Asmek bt. Agob’a satması 200 guruş eşyâ mübâya‘ası Mahmiye-i İstanbul’da Nâzırkızı sokağında sâkin Abraham v. Kigork zimmî meclis-i şer‘-i hatîr-i lâzımü’t-tevkīrde zevcesi şahsını mu‘arrefe Asmek bt. Agob Nasrâniye muvâcehesinde ikrâr-ı tam ve takrîr-i kelâm edip eşyâ-yı memlûkemden iki minder ve iki döşek ve dört yorgan ve dört yasdık ve bir kazgan ve iki tencere ve beş sahan ve bir tasımı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcem mersûme Asmek Nasrâniyeye iki yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve kabz ü kabûl eyledikdensonra semeni olan meblağ-ı mezbûr iki yüz guruşu zevcem mersûme bana def‘ ü teslîm ben dahi yedinden tamamen ahz ü kabz eyledim fîmâ-ba‘d eşyâ-yı muharrere-i mezkûre zevcem mersûme Asmek Nasrâniyenin emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 13 Ra sene [1]242 Şühûdü’l-hâl: Muhzır Feyzullah Çelebi, Kirişçi Ahmed Ağa, Ali Çelebi el-muhzır, İstefan v. Karabet, Haçador v. el-mersûm Abraham