Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 123 Hüküm no: 96 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Latife bt. Halil’in eşi Seyyid Abdullah Ağa’dan vasisi olan annesi Nesibe aracılığıyla boşanması Bi’l-vesâye hul‘ Mahmiye-i İstanbul’da Karagümrük kurbünde Derviş Ali mahallesinde sâkine tahmînen on bir yaşında Latife bt. Halil nâm sagīrenin vâlidesi ve vasîsi zâtı mu‘arrefe Nesibe bt. Salih nâm hatun meclis-i şer‘-i şerîf-i enverde sagīre-i mezbûrenin zevc-i dâhili işbu bâ‘isü’l-vesîka es-Seyyid Abdullah Ağa b. Mehmed mahzarında bi’l-vesâye ikrâr-ı tam ve takrîr-i kelâm edip mezbûr Abdullah vasîsi olduğum sagīre-i mezbûrenin iki yüz elli bir guruş mehr-i müeccel tesmiyesiyle zevc-i medhûlü olup lâkin beynlerinde münâferet vâkı‘a olmağla eğer kızım sagīre-i mezbûre ba‘de’l-bulûğ mehr-i mezkûrunu zevc-i mezbûrdan taleb ve şer‘an ahz ederse mehûzuna ben kefîl ve zâmin olmak üzere mezbûr es-Seyyid Abdullah ile bi’l-vesâye hul‘ olduğumda ol dahi hul‘-ı mezkûru kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ra sene [1]242 Şühûdü’l-hâl: Muhzır İbrahim Çelebi, Muhzır Ali Çelebi, Mustafa Ağa b. Abdullah, Mehmed b. İsmail, Mehmed Cemaleddin b. İbrahim, İzzet Çavuş