Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 123 Hüküm no: 97 Orijinal metin no: [26b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asakir-i Mansure-i Muhammediye neferlerinden Mehmed’in tarlasını satması 40 guruş tarla ferâğı Vilâyet-i Anadolu’da Zağferanbolu kazâsına tâbi‘ Bağceğiz karyesi ahâlisinden Asâkir-i Mansûre-i Muhammediye neferâtından Mehmed b. Dursun’un meclis-i şer‘-i şerîf-i enverde yine karye-i mezbûre ahâlisinden işbu bâ‘isü’l-vesîka Mustafa b. Osman mahzarında ikrâr-ı tam ve takrîr-i kelâm edip bâ-tapu taht-ı tasarrufumda olup karye-i mezbûre hâricinde Doruğu Koru nâm mahâlde vâki‘ ma‘lûmü’l-hudûd bir kıt‘a tarlamı kırk guruş bedel mukābelesinde bâ-ma‘rifet-i sâhib-i arz merkūm Mustafa’ya ferâğ ve tefvîz ve mahâllinde zabta tarafımdan merkūmu taslît eylediğimde ol dahi ber-vech-i muharrer tefevvüz ve kabûl eyledikden sonra bedeli olan kırk guruşu merkūm Mustafa bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d sâlifü’l-beyân tarla mezbûr Mustafa’nın dâhil-i havza-i tasarrufu olup benim kat‘a alâka ve medhalim kalmamışdır dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fî 19 Ra sene [1]242 Şühûdü’l-hâl: Ali Çelebi el-muhzır, Hasan b. Halil, İbrahim b. İsmail, Mehmed b. Osman, Mehmed Çelebi el-muhzır.