Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 124 Hüküm no: 99 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmudpaşa mahallesinde Servi Sokağı’ndaki yanmış olan ev arsasının Natur İsmail’e ait olduğunun tescili Menzil ihbârı Mahmiye-i İstanbul’da Kocamustafapaşa kurbünde sâkin Natur İsmail b. Mehmed’den ber-vech-i âtî istihbâr-ı şer‘î sudûrundan sonra udûl-i ahrâr-ı ricâl-i Müslimînden ve mahmiye-i mezbûrede Mahmudpaşa mahallesi ahâlisinden Hasan Ağa b. Hasan ve Mehmed b. Mahmud ve es-Seyyid Hasan Ağa b. Ali nâm kimesneler li-ecli’l-ihbâr meclis-i şer‘a hâzırûn olup isre’l-istihbâr fi’l-hakīka zikr olunan Mahmudpaşa mahallesinde Servi sokağında vâki‘ bir tarafdan imâm meşrûtası menzil ve bir tarafdan Bezci el-Hâc Mehmed menzili ve bir tarafdan Mehmed Ağa menzili ve bir tarafdan tarîk-i âm ile mahdûd bir bâb muhterik mülk menzil arsası on beş seneden beri işbu müstahbir-i merkūm Natur İsmail Ağa’nın bilâ-nizâ‘ yedinde mülkü olduğu bizim yakīnen ma‘lûmumuzdur deyü her biri alâ-tarîki’ş-şehâde haber vermeleriyle vâki‘ hâl hıfzen li’l-makāl bi’t-taleb ketb olundu. Fî 17 Ra sene [1]242 Şühûdü’l-hâl: Muhzır Ali Çelebi, Muhzır İsmail, Muhzır İbrahim Çelebi.