Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 125 Hüküm no: 100 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa ayanından Yahnikapanzade Seyyid Hacı Ahmed Hasib Efendi’nin Acıköyü isimli çiftliğini satması 25000 guruş, çiftlik mübâya‘ası ferâğı Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Mevlana es-Seyyid Numan Efendi mahmiye-i İstanbul’da Vâlide Hanı’nda vâki‘ Sarrâf tâifesinden Markar v. Mardıros zimmînin odasına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde sâbıkā mahrûse-i Bursa a‘yânı olup oda-i mezkûrda sâkin Yahnikapanzâde es-Seyyid el-Hâc Ahmed Hasib Efendi b. es-Seyyid Ahmed Necib meclis-i ma‘kūd-ı mezkûrda mersûm Markar zimmî muvâcehesinde ikrâr-ı tam ve takrîr-i kelâm edip müstakıllen yedimde mülküm olup mahrûse-i mezbûrede İsa Bey ve Fenârî toprağında Acıköyü çiftliği demekle meşhûr ma‘lûmü’l-aded ahır ve kavaklık ve matbah ve müştemilât-ı sâire-i ma‘lûmeyi hâvî bir bâb çiftlik ve derûnunda mevcûde edevât-ı çift ve hayvanât ve evânî-i nühâsiye ve ma‘lûmü’l-hudûd bağ ve dut hadîkası ve bahçe ve kiremit hadîkasını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Markar zimmîye beş bin guruşa bey‘ ve temlik ve çiftlik-i mezkûra teba‘iyetle zirâ‘at <> ve hırâset olunur mevâzi‘-i adîdede kâin her biri lede’l-ahâli ve’l-cîrân ma‘lûmü’l-hudûd ve’l-kıt‘a tarlalarımı dahi yirmi bin guruş bedel mukābelesinde bâ-ma‘rifet-i sâhib-i arz ferâğ ve tefvîz ve mahâllinde her birini zabt ve tasarrufa tarafımdan merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semen ve bedel cem‘an yirmi beş bin guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d emlâk-ı muharrere-i mezkûre ve âlât-ı çift ve hayvanât mersûm Markar zimmînin emlâk-ı müşterâsı ve hakk-ı sırfı ve zikr olunan tarlalar dahi dâhil-i havza-i tasarrufu olup benim kat‘a alâka ve medhalim kalmamışdır dedikde, vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 15 Ra sene [1]242 Şühûdü’l-hâl: Muhzır İsmail Çelebi, oğlu es-Seyyid el-Hâc Mustafa, Muhzır Mehmed.