Bab Mahkemesi 54 Numaralı Sicil (H. 1102 / M. 1691) cilt: 20, sayfa: 125 Hüküm no: 108 Orijinal metin no: [17a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gevher bt. Behram Çavuş’un cariyesi Timurhan bt. Abdullah’ı vasiyet yoluyla azat etmesi Mahmiye-i İstanbul’da Hoca Hayreddin mahallesi sâkinelerinden olup Gevher bt. Behram Çavuş b. el-Hâc Yusuf Çavuş nâm hâtunun tarafından husûs-ı âti’l-beyânı ikrâra vekîl olduğu zâtını ma‘rifet-i şer‘iyye ile ârifân mahalle-i mezbûre sükkânından Hasan Çelebi b. Halil ve el-Hâc Hüseyin b. Ahmed şehâdetleriyle şer‘an sâbit olan Ali Çelebi b. Veli nâm kimesne meclis-i şer‘-i şerîfde, müvekkile-i mezbûrenin câriye-i memlûkesi olan işbu uzun boylu, gök elâ gözlü, açık kaşlı Rûsiyyetü’l-asl râfi‘atü’l-kitâb Timurhan bt. Abdullah nâm câriye muvâcehesinde bi’l-vekâle ikrâr ve takrîr-i kelâm edip, müvekkile-i mezbûre Gevher Hâtun câriye-i memlûkesi olan mevsûfe-i mezbûre Timurhan’ı tedbîr-i mutlak ile tedbîr [müdebber] edip, bi emrillâhi te‘âlâ fevt olduğunda mevsûfe-i mezbûre Timurhan mâlımdan mu‘tekā olup, eşyâ-i memlûkemden iki minder ve dört yasdık ve bir keçe ve iki yorgan ve bir kaliçe ve bir bakır tepsi ve bir hamam tası mevsûfe-i mezbûre Timurhan’a verile deyu vasiyyet eyledi. Min ba‘d mevsûfe-i mezbûrenin bey‘-i câiz olmayıp, vech-i meşrûh üzre müdebbere olmuşdur dedikde, gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sânî min Cumâdelâhire li sene isneteyn ve mi’e ve elf. Şuhûdü’l-hâl: Mehmed Çelebi b. Mehmed, es-Seyyid Hasan Çelebi b. Osman, es-Seyyid Abdullah Efendi b. Hasan Efendi, Ali Çelebi b. Mustafa.