Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 126 Hüküm no: 101 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe bt. Mehmed’in Süleyman Ağa’da olan alacağını tahsil ve elinde rehin bulunan berber dükkânı gediğini iade etmesi Fekk-i Rehin, 1040 guruş Hâmişine sebt olunan hüccetde mezkûretü’l-ism zâtı mu‘arrefe Nesibe bt. Mehmed nâm hatun meclis-i şer‘-i şerîf-i enverde kezâlik derûn-ı hüccet-i mezkûrede mezkûrü’l-ism Süleyman Ağa b. Ali mahzarında ikrâr-ı tam ve takrîr-i kelâm edip benim merkūm Süleyman Ağa zimmetinde bundan akdem malımdan ve yedimden istidâne ve kabz eylediği sekiz yüz guruş ve kezâlik malımdan ve yedimden iştirâ ve kabz eylediği bir hilâlî sâ‘at semeninden iki yüz kırk guruş ki cem‘an bin kırk guruş deyn mukābelesinde hüccet-i mezkûrda tafsîl ü beyân olunduğu üzere bir bâb berber dükkânı derûnunda mevcûde bâ-defter-i müfredât âlât-ı lâzıme-i ma‘lûmesini bana rehin vaz‘ ve teslîm, ben dahi yedinden irtihân ve kabz ü kabûl eylemiş idim. El-hâletü hâzihî merkūm Selim [Süleyman] Ağa deyni olan meblağ-ı mecmû‘-ı mezbûr bin kırk guruşu bana def‘ ü teslîm ben dahi yedinden tamamen ahz ü kabz ve rihân-ı mezkûreyi rehniyetden fekk birle merkūm Selim [Süleyman] Ağa’ya teslîm edip min-ba‘d meblağ-ı mezbûrdan merkūm Selim [Süleyman] Ağa zimmetinde bir akçe ve bir habbe bâkī kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 19 Ra sene [1]242 Şühûdü’l-hâl: Muhzır Emin Çelebi, Muhzır Mehmed Çelebi