Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 131 Hüküm no: 108 Orijinal metin no: [27b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hacı Ali’nin yanında bulunan küçük kızı Rasime için babası Seyyid Osman üzerine nafaka takdir olunması Nafaka-i sagīr Mahmiye-i İstanbul’da Tekfur Sarayı kurbünde Molla Aşkī mahallesinde sâkine ve zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-vesîka Şerife Emine bt. el-Hâc Ali nâm hatun meclis-i şer‘-i şerîf-i enverde zevc-i sâbıkı es-Seyyid Osman b. es-Seyyid Ahmed mahzarında ikrâr-ı tam ve takrîr-i kelâm edip merkūm es-Seyyid Osman ile zevciyet beynimizde kāime iken merkūmun firâşından hâsıl ve benden mütevellide ve bi-hakkı’l-hıdâne hacr ve terbiyemde olan tahmînen yirmi günlük sulbiye kızı Şerîfe Râsime [28a] nâm sagīrenin malı olmayıp ol-vechile nafakaya muhtâc olmağla sagīre-i mezbûrenin nafaka ve kisve-bahâsı için babası merkūm üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve-bahâsı için babası merkūm üzerine bi’t-terâzî târih-i kitâbdan beherşehr beşer guruş farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve ve levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Şerife Emine Hatun’a izin vermeğin mâ-vaka‘a [bi’t-taleb ketb olundu]. Fî 23 S sene [1]242 Şühûdü’l-hâl: Muhzır Ebûbekir Çelebi, Muhzır İsmail Çelebi, Muhzır İbrahim Çelebi, Muhzır Ali Çelebi, Muhzır Feyzullah Çelebi.