Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 138 Hüküm no: 118 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacir v. Karabet’in kavukçu dükkânı gediğini oğlu Anparsun’a satması Husûs ile oda mübâya‘ası, 1000 guruş. Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbul’da Kumkapı kurbünde Dülbendçi Hüsameddin mahallesinde vâki‘ Hacır v. Karabet zimmînin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Nebevî ettikde mersûm Hacır zimmî meclis-i ma‘kūd-ı mezkûrda sulbî oğlu işbu hâmilü’r-rakīm Anparsun zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Bitpazarı kurbünde Kavukçular Lonca Hanı demekle ma‘rûf hanın tabaka-i ulyâsında sol tarafda Oseb ve Ağya zimmîler odaları beynlerinde kâin beher mâh ikişer guruş icâre tesmiyesiyle taht-ı icâremde olan iki aded demir pencereli ve demir kapılı bir bâb kavukçu odası derûnunda mevcûde beyne’l-esnâf gedik ta‘bîr olunur bâ-hüccet-i şer‘iye müstakıllen yedimde emvâlim olan bir sandık ve bir mikrâs ve dört kalıp ve bir minder ve bir hasır ve bir akçe tahtası ve sâir âlât-ı lâzıme-i ma‘lûmemi târih-i vesîkadan bir buçuk sene mukaddem tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile oğlum mersûm Anparsun zimmîye bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin guruşu oğlum müşteri-yi mersûm târih-i merkūmda bana def‘ ve teslîm, ben dahi yedinden tamamen ahz ü kabz edip âlât-ı muharrere-i mezkûre târih-i mezkûrdan beri oğlum mersûm Anparsun zimmînin emvâl-i müşterâsı ve hakk-ı sırfı olup benim târih-i mezkûrdan beri kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan herbirimiz âharın zimmetini ibrâ ve iskāt ve tarafeynden herbirimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 25 Ra sene [1]242. Şühûdü’l-hâl: Es-Seyyid Mehmed İzzet Ağa b. Abdurrahman, Hafız Mehmed Ağa b. el-Hâc Mustafa, Muhzır Mehmed Çelebi, Çukadâr Mustafa Ağa, Karakaş Avadis v. Arakil, Avraham v. Ohannes, Bedros v. Hacır?.