Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 142 Hüküm no: 124 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın bazı ev eşyalarını kızı Zübeyde bt. Mehmed’e satması ve bir takım süs eşyalarını da hibe etmesi Eşyâ Mübaya‘ası, nefy-i hibe 500 guruş Mahrûse-i Galata’ya muzâfe Rumelihisârı’nda sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fatıma bt. Mustafa nâm hatun meclis-i şer‘-i şerîf-i enverde kerîmesi kezâlik zâtı mu‘arrefe olan işbu bâ‘isetü’l-vesîka Zübeyde bt. Mehmed Ataullah tarafından husûs-ı âti’l-beyânda tasdîka vekîli zevci Ali Ağa b. Hüseyin mahzarında ikrâr-ı tam ve takrîr-i kelâm edip eşyâ-yı memlûkemden altı minder ve on dört yasdık ve üç mak‘ad ve bir oda keçesi ve on iki sahan ma‘a kapak ve altı tencere ma‘a kapak ve bir kazgan ve bir nühâs mangal ve iki güğüm ve dokuz yorgan ve iki döşek ve iki şilte ve dört baş yasdığım tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile kızım mezbûre Zübeyde Hatun’a beş yüz guruşa bey‘ ü temlik ve yine malımdan elmaslı saray yıldız resmi çiçek ve iki elmaslı iğne ve bir çift elmas küpe ve bir gül yüzüğümü kızım mezbûreye hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz guruş mutâlebesine müte‘allika da‘vâdan kızım mezbûre Zübeyde Hatun’un zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ibrâ-yı mezkûrumu kabûl eyledi. Fîmâ-ba‘d eşyâ-yı muharrere-i mezkûre kızım mezbûre Zübeyde Hatun’un emvâl-i müşterâsı ve huliyyât-ı mezkûre dahi emvâl-i <> mevhûbesi olup benim kat‘a alâka ve medhalim kalmadığından mâ‘adâ huzzâr-ı mezkûrda kızım mezbûre ile sâkine olduğumuz menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u kızım mezbûre Zübeyde Hatun’un emvâli olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 27 Ra sene [1]242 Şühûdü’l-hâl: Ali Çelebi el-muhzır, Hamamcılar Kethudâsı Osman Efendi, Kahveci Nureddin Molla, Berber Mehmed Efendi, İsmail Çelebi el-muhzır.