Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 143 Hüküm no: 125 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Ağa’nın Kargı kazasındaki tarla ve bahçesini Bostancı Hasan’a satması Bahçe ve tarla ferâğı, 140 guruş Vilâyet-i Anadolu’da Kengiri (Çankırı) sancağında Kargı kazâsı ahâlisinden olup mahmiye-i İstanbul’da Atik Ali Paşa mahallesinde sâkin Mehmed Sadık Ağa b. Ali meclis-i şer‘-i şerîf-i enverde işbu bâ‘isü’l-vesîka Bostânî Hasan b. Mustafa mahzarında ikrâr-ı tam ve takrîr-i kelâm edip akd-i âti’z-zikrin sudûruna değin yedimde malım ve hakkım olup kazâ-i mezbûrda vâki‘ ma‘lûmü’l-hudûd bir kıt‘a mülk bahçesi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr Hasan’a yüz guruşa bey‘ ü temlik ve yine kazâ-i mezbûrda vâki‘ ma‘lûmü’l-hudûd ve’l-kıt‘a tarlalar bâ-tapu taht-ı tasarrufumda olmağla ben zikr olunan tarlaları kırk guruş bedel mukābelesinde bâ-ma‘rifet-i sâhib-i arz ferâğ ve tefvîz ve her birini mahâllinde zabta tarafımdan merkūmu taslît eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen ve bedel cem‘an yüz kırk guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim fîmâ-ba‘d sâlifü’l-beyân bahçe mezbûr Hasan’ın mülk-i müşterâsı ve mârrü’z-zikr tarlalar dahi dâhil-i havza-i tasarrufu olup benim kat‘a alâka ve medhalim kalmamışdır dedikde, gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî-gurre-i R sene [1]242 Şühûdü’l-hâl: Mehmed Çelebi el-muhzır, Ali Çelebi el-muhzır, Abdulfettah Çelebi, İsmail Çelebi el-muhzır, Bostânî Mehmed Ağa b. Ali, Bostânî Hüseyin Ağa b. Osman, Bostânî Hüseyin b. Mehmed.