Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 144 Hüküm no: 126 Orijinal metin no: [29b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa ve eşi Nazife’nin müşterek sahib oldukları menzil enkazını Yusuf Ağa’ya satmaları ve arsasını da hibe etmeleri Mukāta‘alı menzil mübâya‘ası, 900 guruş Medîne-i Üsküdar’a tâbi‘ Kādı karyesinde sâkinler Ali Ağa b. Mehmed Salih b. Abdullah ve zevcesi Nazife bt. Mehmed b. Abdullah tarafından husûs-ı âti’l-beyânda vekîl olduğu Mehmed b. Abdülkerim ve Mehmed Salih b. Ali şehâdetleriyle sâbit olan el-Hâc Selim Ağa b. Ali meclis-i şer‘-i şerîf-i enverde işbu bâ‘isü’l-vesîka Yusuf Ağa b. Mustafa mahzarında bi’l-vekâle ikrâr-ı tam ve takrîr-i kelâm edip mahmiye-i İstanbul’da Sultan Bâyezid Câmi‘-i şerîfi kurbünde Yahnikapan sokağında Kürt Abdurrahman Efendi ve Lekeci Mustafa ve Osman Efendi menzilleri ve tarîk-i âm ile mahdûd doksan zirâ‘ arsa Lala Hüseyin Paşa ve Hasan Ağa vakıflarına mukāta‘a-i kadîme ile taht-ı tasarruflarında ve üzerinde mevcûde bi’l-cümle enkāz-ı mevcûdesi akd-i âti’z-zikrin sudûruna değin ale’l-iştirâki’s-seviyy yedlerinde mülkleri olmağla ben bi’l-cümle enkāz-ı mevcûde-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr Yusuf Ağa’ya dokuz yüz guruşa bi’l-vekâle bey‘ ü temlik ve teslîm ve mukāta‘alı arsasını dahi bâ-ma‘rifet-i mütevellî meccânen ferâğ ve tefvîz ve teslîm eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabz ü kabûl eyledikden sonra semeni olan meblağ-ı mezbûr dokuz yüz guruşu bana def‘ ü teslîm, ben dahi yedinden bi’l-vekâle tamamen ahz ü kabz eyledim, fîmâ-ba‘d enkāz-ı mevcûde-i mezkûre mezbûr Yusuf Ağa’nın mülk-i müşterâsı ve mukāta‘alı arsası dahi dâhil-i havza-i tasarrufu olup müvekkillerim mezbûrânın kat‘a alâka ve medhalleri kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 26 Ra sene [1]242 Şühûdü’l-hâl: Muhzır Ali Çelebi, Muhzır Mehmed Çelebi, Muhzır İsmail Çelebi