.:: İstanbul Kadı Sicilleri ::.


Mahmudpaşa Mahkemesi 1 Numaralı Sicil (H. 1240-1242 / M. 1825-1827)
cilt: 91, sayfa: 144
Hüküm no: 127
Orijinal metin no: [29b-6]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Hacı Yusuf’un vârisleri Ahmed, Zübeyde ve Hamide’nin kendilerine intikal eden Bogasıcı gediği hisselerini Seyyid Hacı Ali Ağa’ya satmaları

Bogasıcı gediği, 3333 guruş 15 para

Vilâyet-i Anadolu’da Adana ahâlisinden olup mahmiye-i İstanbul’da Gedikpaşa kurbünde sâkin iken bundan akdem fevt olan el-Hâc Yusuf b. Hüseyin’in verâseti zevce-i menkûha-i metrûkesi Emine bt. Abdullah ile sulbiye kebîre kızları Zübeyde ve Hamide’ye ve li-ebeveyn er karındaşı oğlu Ahmed b. Davud’a münhasıra ve tashîh-i mes’elesi yirmi dört sehmden olup sihâm-ı mezbûreden üç sehmi zevcesi mezbûre Emine Hatun’a ve sekizer sehmden on altı sehmi kızları mezbûrât Hamide ve Zübeyde’ye ve beş sehmi karındaşı oğlu merkūm Ahmed’e isâbeti tahakkukundan sonra mezbûr Ahmed ile zâtları zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûrân Emine ve Hamide hatunlar meclis-i şer‘-i şerîf-i enverde işbu bâ‘isü’l-vesîka es-Seyyid el-Hâc Ali Ağa b. Hafız Mehmed [30a] muvâcehesinde her biri bi’l-verâse ikrâr-ı tam ve takrîr-i kelâm edip merkūm Ahmed Ağa mûrisimiz müteveffâ-yı mezbûrun mahmiye-i mezbûrede Çarşı içinde Küçük Zaferan Hanı karşısında vâki‘ Donbayoğlu ve el-Hâc Emin dükkânları beynlerinde kâin bir kemer bir kepenk bir bâb bogasici dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı ma‘lûme hayatında müstakıllen yedinde emvâli olup ba‘de vefâtihî âlât-ı muharrere-i mezkûre ber-tashîh-i mezkûr bizimle mezbûre Zübeyde’ye mevrûs olmağla biz âlât-ı muharrere-i mezkûrede ber-tashîh-i mezkûr mâlikler olduğumuz on altı sehm hisse-i şâyi‘amızı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid el-Hâc Ali Ağa’ya üç bin üç yüz otuz üç guruş on üç(beş) paraya bey‘ ü temlik ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç bin üç yüz otuz üç guruş on üç parayı müşteri-yi merkūm bize def‘ ü teslîm biz dahi yedinden tamamen ahz ü kabz ve bi-kadri’l-hısas beynimizde iktisâm eyledik, fîmâ-ba‘d âlât-ı muharrere-i mezkûrenin ber-tashîh-i mezkûr on altı sehmi merkūm es-Seyyid el-Hâc Ali Ağa’nın emvâl-i müşterâsı ve hakk-ı sırfı olup bizim kat‘a alâka ve medhalimiz kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.]

Fî 27 Ra sene [1]242

Şühûdü’l-hâl: Hüseyin Ağa b. Hasan, Muhzır Ali Çelebi, İbrahim Ağa b. Ali, Muhzır Fettah Çelebi, Hafız Mehmed Ağa b. el-Hâc Mustafa, Muhzır Emin Çelebi.