Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 146 Hüküm no: 129 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici Seyyid İbrahim Ağa’nın eskici dükkânı gediğini Ömer Ağa’ya satması Eskici Gediği, 9000 guruş Vilâyet-i Anadolu’da Niğde sancağında Develi kazâsına tâbi‘ Müslim Everek’i karyesi ahâlisinden olup mahmiye-i İstanbul’da Parmakkapı kurbünde sâkin Eskici es-Seyyid İbrahim Ağa b. Abdullah b. Abdurrahman tarafından husûs-ı âti’l-beyânda ikrâra vekîl olduğu Hafız Süleyman Ağa b. el-Hâc Halil ve Ömer Ağa b. Ali şehâdetleriyle sâbit olan Kethudâ Mustafa Ağa b. Mustafa meclis-i şer‘-i şerîf-i enverde işbu bâ‘isü’l-vesîka Ömer Ağa b. Ali mahzarında bi’l-vekâle ikrâr-ı tam ve takrîr-i kelâm edip müvekkilim merkūm İbrahim Ağa sâlifü’l-beyân Parmakkapı dâhilinde sebîl ittisâlinde kâin bir bâb eskici dükkânı derûnunda mevcûde beyne’l-esnâf gedik ta‘bîr olunur müstakıllen yedimde emvâlim olan bir destgâh ve iki muşta ve on çift kalıb ve bir akçe tahtası ve bir çekmece ve bir seccâde ve sâir âlât-ı lâzıme-i ma‘lûmemi târih-i vesîkadan dört sene mukaddem tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Ömer Ağa’ya dokuz bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr dokuz bin guruşu târih-i mezkûrda bana def‘ ü teslîm ben dahi yedinden tamamen ahz ü kabz edip âlât-ı muharrere-i mezkûre târih-i mezbûrdan ber-vech-i merkūm Ömer Ağa’nın emvâl-i müşterâsı ve hakk-ı sırfı olup târih-i mezbûrdan beri benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde, gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 Ra [1]242 Şühûdü’l-hâl: Tophâneli el-hâc Mustafa Ağa, Cumaoğlu Abdullah Ağa, el-Hâc Halid Ağa, Muhzır Mehmed Çelebi, Muhzır Ebûbekir Çelebi.