Bab Mahkemesi 54 Numaralı Sicil (H. 1102 / M. 1691) cilt: 20, sayfa: 126 Hüküm no: 110 Orijinal metin no: [17b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Ali ile kardeşi İsa’nın tarla hisselerini sipahiye terk ettikleri Vilâyet-i Anadolu’da Kastamonu sancağında Küre-i Nühâs kazâsına tâbi‘ Aslanlı nâm karye sükkânından Veli b. Ali nâm kimesne meclis-i şer‘-i şerîf-i enverde, karye-i mezbûrda sipâhi olan işbu bâ‘isü’l-kitâb Ahmed Ağa b. Hasan mahzarında bi’t-tav‘i’s-sâf ikrâr-ı tâm ve takrîr-i kelâm edip, karındaşım olup karye-i mezbûrede sâkin olan İsâ ile mukaddemâ fevt olan babamızdan ikimize müntakil olup, karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-kat‘ tarlalarda olan nısf hissesi hâlâ bilâ-veled-i zükûr fevt olup, müstahıkk-ı tapu olmuş idi. Lâkin ben cilâ-yı vatan edip, mahmiye-i İstanbul’da sâkin olup kat‘-ı alâka etmekle, mezbûr Ahmed Ağa zikr olunan arâzîde karındaşım mezbûrun hissesi ile benim hissemi dilediği kimesneye tefvîz eyleyip, benim aslâ ve kat‘â alâkam kalmayıp kasr-ı yed ve husûs-ı mezbûra müte‘allika sâhib-i arz olan mezkûr Ahmed Ağa ile da‘vâ ve nizâ‘ım yokdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire li sene isneteyn ve mi’e ve elf. Şuhûdü’l-hâl: El-Hâc Mustafa b. Osman, Hasan Beşe b. Mahmud, Receb b. Osman, el-Hâc Mehmed b. Mehmed.