Bab Mahkemesi 54 Numaralı Sicil (H. 1102 / M. 1691) cilt: 20, sayfa: 127 Hüküm no: 112 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hacı Mustafa’nın Süleyman Beşe b. Süleyman’daki alacağını taksitlendirmesi Mahmiye-i İstanbul’da Ergili mahallesi sâkinelerinden Ayşe bt. el-Hâc Mustafa nâm hâtun ba‘de’t-ta‘rîf-i şer‘î meclis-i şer‘-i şerîf-i enverde, Süleyman Beşe b. Süleyman mahzarında ikrâr ve takrîr-i kelâm edip, işbu yedimde olan mazmûnı müsbit hüccet-i şer‘iyye nâtık olduğu üzre mezbûr Süleyman Beşe zimmetinde cihet-i deyn-i şer‘îden mahkûme iki yüz esedî guruş hakkım olup, mezbûr Süleyman def‘ ve edâya iktidârı olmamağla te’cîl ve taksîte tâlib olmağın, ben dahi beher otuz yevm tamâmında bana dörder guruş vermek üzre meblağ-ı mezbûru târih-i kitâbdan bin dört yüz seksen güne değin te’cîl ve taksît eylediğimde, mezbûr Süleyman Beşe dahi taksît-i mezbûreyi kabûl ve meblağ-ı mezbûru ber vech-i muharrer edâya ta‘ahhüd eyledi dedikde, gıbbe’t-tasdîki’ş-şer‘î mezbûr Süleyman Beşe’nin li ebeveyn kız karındaşı işbu hâzır bi’l-meclis Meryem nâm hâtun mezbûrun nefsine ve gaybet ederse meblağ-ı taksît-i mezbûru edâya tarafeynden emr ve kabûlü hâviye kefâlet-i sahîha-i şer‘iyye ile kefîl olmağın, işbu vesîka-i enîka, mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Osman Çavuş b. Ebûbekir, Ahmed Efendi b. Şaban, es-Seyyid Yahya Çelebi b. Şaban, es-Seyyid Nureddin, Mehmed b. Ahmed.