Bab Mahkemesi 54 Numaralı Sicil (H. 1102 / M. 1691) cilt: 20, sayfa: 128 Hüküm no: 114 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed ile Seyyid Hüseyin Ağa b. Hasan Ağa’nın birbirlerinin zimmetini ibra etmesi Vilâyet-i Anadolu’da Pazarsuyu kazâsına tâbi‘ Behramşâh-ı Bâlâ nâm karye sükkânından Ahmed Ağa b. Mehmed nâm kimesne meclis-i şer‘-i şerîf-i enverde, yine karye-i mezbûre sükkânından es-Seyyid Hüseyin Ağa b. Hasan Ağa nâm mahzarında ikrâr-ı tâm ve takrîr-i kelâm edip, mezbûr Hüseyin Ağa ile beynimizde ba‘zı ahz u i‘tâ vâki‘ olmuş idi. El-hâletü hâzihî mezbûr es-Seyyid Hüseyin Ağa ile beynimizde hesâb görüp, mezbûr es-Seyyid Hüseyin Ağa zimmetinde bir akçe ve bir habbe kalmayıp, ba‘de’l-yevm âmme-i da‘vâdan her birimiz âharın zimmetini ibrâ-i âmm-ı râfi‘ü’l-hisâm ile ibrâ ve iskāt eyledik dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî evâsıtı Cemâziyelevvel li sene isneteyn ve mi’e ve elf. Şuhûdü’l-hâl: es-Seyyid Mehmed b. İbrahim, es-Seyyid Ali b. es-Seyyid Mehmed, Ahmed Efendi, Mehmed Efendi b. Ahmed, Şeyh Hasan Efendi, Ali b. İsa, Şeyh Hayreddin, es-Seyyid Nurullah b. Çelebi Mahmud, Mustafa Beşe b. Mehmed ve gayruhüm mine’l-hâzırîn.