Bab Mahkemesi 54 Numaralı Sicil (H. 1102 / M. 1691) cilt: 20, sayfa: 128 Hüküm no: 115 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Odabaşı b. Kenan’ın verâsetinin kızkardeşi ve annesi ait olması Dergâh-ı âlî Yeniçerilerinin yüz birinci odası odabaşısı olup Girit’de bundan akdem vefât eden Mehmed Odabaşı b. Kenan b. Abdullah’ın li ebeveyn kız karındaşı ve vârisesi olduğunu iddi‘â eden Fâtıma nâm hâtun meclis-i şer‘de, tereke-i müteveffâ-yı mezbûra bi’l-vesâye vaz‘-ı yedi sâbit olan Mustafa Beşe b. İbrahim mahzarında üzerine da‘vâ ve takrîr-i kelâm edip, ben müteveffâ-yı mezbûr ile li ebeveyn karındaşlar olup, babamız ismi Kenan b. Abdullah vâlidemiz işbu hâzıra bi’l-meclis Havva bt. Abdullah ve maskat-ı re’simiz Galata kazâsında Boğazkesen kal‘ası mahallâtından Meydan mahallesi olup, müteveffâ-yı mezbûrun verâseti, vâlidesi mezbûre Havva ile bana münhasıra iken mezbûr Mustafa Beşe tereke-i müteveffâ-yı mezbûru bize teslîmden imtinâ‘ eder, suâl olunup alıverilmesi matlûbumdur dediklerinde, gıbbe’s-suâl mezbûr Mustafa Beşe [cevâbında] tereke-i müteveffâ-yı mezbûra bi’l-vesâye vaz‘-ı yedini ikrâr, lâkin mezbûretânın verâsetlerini inkâr edicek, mezbûretândan sıdk-ı makāline beyyine taleb olundukda, zât-ı mezbûretânı ma‘rifet-i şer‘iyye ile ârifân olup, yine kal‘a-i mezbûre müstahfızlarından Mustafa Çelebi b. Hüseyin ve el-Hâc Mehmed b. Ali nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ mezbûre Fâtıma Hâtun müteveffâ-yı mezbûr Mehmed Odabaşı ile li ebeveyn karındaşlar olup, babaları ismi Kenan b. Abdullah ve vâlideleri işbu mezkûre Havva ve maskat-ı re’sleri mârru’z-zikr Boğazkesen kal‘asında Meydan mahallesidir, müteveffâ-yı mezbûrun verâseti merkūmân Havva ve Fâtıma’ya münhasıradır gayrı vârisi ve terekesine müstahıkk-ı âhar olduğu ma‘lûmumuz değildir, tereke-i müteveffâ-yı mezbûru merkūmetân için hakk-ı taleb ve ahz vardır. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle ba‘de’l-hükm, mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: El-Hâc Maksud b. Halil, Mustafa b. Osman, Mustafa b. el-Hâc Ahmed, Ahmed Beşe b. Mehmed, Mustafa b. Mehmed.