Bab Mahkemesi 54 Numaralı Sicil (H. 1102 / M. 1691) cilt: 20, sayfa: 129 Hüküm no: 116 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Ali’nin oğullarının icâreteynli vakıf evdeki hisselerinin Sâliha bt. Abdullah’a devredildiği Mahmiye-i İstanbul’da Hasan Halîfe mahallesinde sâkin iken bundan akdem vefât eden İbrahim b. Ali’nin sulbî sagīr oğulları Ahmed ve Ali’nin vâlideleri olup üzerlerine kıbel-i şer‘den mansûbe vasîleri olan Havva bt. Abdullah nâm hâtun ba‘de’t-ta‘rîf meclis-i şer‘de, zikr-i âtî vakfın vâkıfı ve mütevellîsi olan Hızır Ağa b. Hamza hâzır olduğu hâlde, bâ‘isetü hâze’l-vesîka Sâliha bt. Abdullah nâm hâtun mahzarında bi’l-vesâye ikrâr ve takrîr-i kelâm edip, mahmiye-i mezbûrede vâki‘ lede’l-ahâlî ma‘lûmü’l-hudûd menzil-i mezbûr Hızır Ağa’nın vakfından olup, icâreteyn-i ma‘lûmeteyn ile müteveffâ-yı mezbûrun tasarrufunda olup, ba‘de vefâtihî Ahmed ve Ali’ye ve âhar oğlu Osman ve kızları Hatice’ye intikāl edip, ba‘dehû mezbûr Hasan bilâ-veled fevt olmağla hissesi vakfa âid olup ve merkūme Hatice dahi hissesini mezbûre Sâliha[’ya] ferâğat edip, ancak vasîleri olduğum sagīrân-ı mezbûrânın nısf hisse-i şâyi‘aları kalıp, lâkin sagīrân-ı mezbûrânın mâlları olmamağın hisselerini ferâğa kıbel-i şer‘den me’zûn olunduğum ecilden sagīrânın nısf hisselerini zarûret-i nafakaları için ecr-i misli olan yüz otuz guruşa mütevellî-i mezbûrun izn ve ma‘rifetiyle mezbûre Sâliha vesâyeten ferâğ ve tefvîz, ol dahi tefevvüz ve kabûl edip, bedel-i ferâğ olan meblağ-ı mezbûr yüz otuz guruşu mukaddemâ mezbûre Sâliha’dan ahz u kabz etmişidim. Ba‘de’l-yevm sagīrân-ı mezbûrân Ahmed ve Ali’nin hisseleri dahi mezbûre Sâliha’nın tasarrufundadır. Kimesnenin alâka ve medhali kalmamışdır dedikde, gıbbe’t-tasdîki’ş-şer‘î mezbûre Sâliha’nın oğlu Ali b. Kadri ve kızı Ümmühâni ve zevci Ali Beşe b. Abdurrahman her biri sagīrân-ı mezbûrân bir tarîkle hisselerine hükm-i hâkim ile ahz u kabz ederlerse, bedel-i mezbûra biz kefîl ve zâminiz dediklerinde, bi emri’t-tasdîki’ş-şifâhî mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Abdullah b. Ahmed, Nasuh Efendi el-imâm, Çelebi b. Nuh, Hasan Çelebi el-Müezzin.