Bab Mahkemesi 54 Numaralı Sicil (H. 1102 / M. 1691) cilt: 20, sayfa: 131 Hüküm no: 118 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram Bey b. Süleyman’ın menzilini Abdullah Çelebi b. Mehmed’e satması Mahmiye-i İstanbul’da Papasoğlu mahallesinde sâkin iken Bayram Bey b. Süleyman meclis-i şer‘-i şerîf-i enverde, işbu bâ‘isü’l-kitâb Abdullah Çelebi b. Mehmed mahzarında ikrâr-ı tâm ve takrîr-i kelâm edip, akd-i âtî sudûruna değin yedimde mülküm olup mahmiye-i mezbûrede Debbâğ Yunus mahallesinde vâki‘ bir tarafdan Fetvâcı Ali Çelebi b. Abdünnebî mülkü bir tarafdan Hazînedâr Hasan Çelebi b. Hüseyin mülkü ve bir taraf tarîk-i âm ile mahdûd, dâhiliyesi fevkānî iki oda ve bir sofa ve tahtânî bir matbah odası ve demir kapılı mahzen ve havlu ve hâriciyesi fevkānî oda ve tahtında ahırı müştemil mülk menzili, bi cümleti’t-tevâbi‘ ve’l-levâhık ve kâffe-i menâfi‘ ve merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı kat‘î ile merkūm Abdullah Çelebi’ye üç yüz altmış esedî guruşa bey‘ ve temlîk ve teslîm, ol dahi iştirâ ve tesellüm ve kabz ve kabûl ettiğinden sonra semeni olan meblağ-ı mezbûr üç yüz altmış esedî guruşu bana edâ ve teslîm, ben dahi yedinden bi’t-tamâm ahz u kabz ve istîfâ eyledim. Ba‘de’l-yevm menzil-i mahdûd-ı mezkûrda vechen mine’l-vücûh hak ve alâkam kalmayıp, cümle müştemilâtıyla müşterî-i mezbûr Abdullah Çelebi’nin mülk-i müşterâsıdır. Keyfe mâ yeşâ ve yahtâr mutasarrıf olsun dedikde, gıbbe’t-tasdîk mâ hüve’l-vâki‘ bi’t-taleb [ketb] olundu. Fi’l-yevmi’l-hâmis aşer min Cemâziyelevvel li sene isneteyn ve mi’e ve elf. Şuhûdü’l-hâl: Ahmed Efendi b. Mahmud, el-Hâc Süleyman b. Halil, Süleyman Efendi b. Osman, Ahmed Çelebi b. Nasuh, Ali Çelebi b. Yusuf.