Bab Mahkemesi 54 Numaralı Sicil (H. 1102 / M. 1691) cilt: 20, sayfa: 131 Hüküm no: 119 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanaki v. Katarkurna’nın menzilini Yamandi v. Preşkova’ya satması Mahmiye-i İstanbul’da Fenerkapısı dâhilinde Abdi Subaşı mahallesi sükkânından Yanaki v. Katarkurna? nâm zimmî meclis-i şer‘-i şerîf-i enverde, işbu bâ‘isü’s-sifr Yamandi v. Preşkova nâm zimmî muvâcehesinde ikrâr ve takrîr-i kelâm edip, akd-i âti’z-zikrin sudûruna değin yedimde mülk ve hakkım olup, mahalle-i mezkûrede vâki‘ bir tarafdan Cevâhirci Andriye mülkü ve bir tarafdan Meydancı Bila? mülkü ve bir tarafdan ba‘zan Kuyumcu Peraşer mülkü ve ba‘zan tarîk-i âm ve bir tarafdan yine tarîk-i âm ile mahdûd ve tabaka-i ulyâsında iki bâb oda ve dehliz ve tabaka-i vustâsında iki bâb oda ve süflâsında iki bâb oda ve mahzen ve bi’r-i mâ ve üç kenîf ve havluyı müştemil mülk menzilimi, cümle tevâbi‘ ve levâhıkı ile mezbûr Yamandi tarafından îcâb ve kabûlü hâvî bey‘-i kat‘î ile altı yüz elli beş esedî guruşa bey‘ ve temlîk ve teslîm, ol dahi ber vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr altı yüz elli esedî guruşu mezbûr Yamandi yedinden tamâmen ahz u kabz eyledim. Ba‘de’l-yevm menzil-i mahdûd-ı mezkûrda benim alâka ve medhalim kalmayıp mezbûr Yamandi’nin mülk-i müşterâsıdır. Keyfe mâ yeşâ ve yehtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel sene 1102. Şuhûdü’l-hâl: Süleyman Efendi b. Abdullah el-imâm, Hüseyin Efendi b. Hasan el-müezzin, İbrahim Bey b. Abdullah, Abdülkādir Efendi b. İsâ el-müezzin, İbrahim Çelebi b. Ahmed, Dimitri? v. Kostantin, Avadik v. Haçador, Papayani v. Duma, Papa Nikori? v. İstamo.