Bab Mahkemesi 54 Numaralı Sicil (H. 1102 / M. 1691) cilt: 20, sayfa: 132 Hüküm no: 120 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdülaziz’in kendisi ve vekilleri adına müşterek menzillerini Fâtıma bt. Mehmed’e satması Cezîre-i Cerbe ahâlîsinden olup hâlâ mahmiye-i İstanbul’da Hızır Bey mahallesinde sâkin Mehmed Çelebi b. Abdülaziz nâm kimesne kendi tarafından asâleten ve li ebeveyn ammileri Ömer ve Said ibney el-Hâc İsâ b. Ali ve ammisi oğlu Mesud b. Ebû Selam b. Ali nâm kimesneler ve ceddesi Lülüe bt. Mela Abd b. Abdullah nâm hâtun taraflarından husûs-ı âti’l-beyâna vekîl olduğu el-Hâc Abdurrahman b. el-Hâc Salim ve el-Hâc Yusuf b. Abdullah şehâdetleriyle şer‘an sâbit olmağla dahi vekâleten meclis-i şer‘-i şerîfde, işbu bâ‘isetü’l-kitâb Fâtıma bt. Mehmed nâm hâtun mahzarında ikrâr-ı tâm ve takrîr-i kelâm edip, arsası merhûm Hoca Sadık Vakfı’ndan olmağla ayda on beş akçe ücret-i maktû‘a ile taht-ı tasarrufumuzda olup ve ebniyesi benimle müvekkilûn-ı merkūmdan Ömer ve Said ve Mesud ve Lulde’nin beynimizde müşterek mülk-i mevrûsumuz olup, mahmiye-i mezbûrede Gül Câmi‘i mahallesinde vâki‘ bir tarafdan mütevellîye Râbia Hâtun menzili ve bir tarafdan Yemenîzâde el-Hâc Mehmed tasarrufunda olan vakıf menzil ve bir tarafdan yine vakf-ı mezbûr ve bir tarafdan tarîk-i âmla mahdûd dâhiliyesi iki fevkānî ve bir tahtânî oda ve dehliz ve kenîf ve hâriciyesi bir fevkānî ve bir tahtânî oda ve sofa ve su kuyusu ve mâbeyn dehlizi müştemil menzilin mülkümüz olan ebniye-i mezbûresini, bi cümleti’t-tevâbi‘ ve’l-levâhık bey‘-i bâtt-ı kat‘î ile mezbûre Fâtıma Hâtun’a iki yüz yetmiş guruşa asâleten ve vekâleten bey‘ ve teslîm ve arsasını izn-i mütevellî ile meccânen ferâğ ve tefvîz, ol dahi iştirâ ve tesellüm ve tefevvüz ve kabz ve kabûl eylediğinden sonra semeni olan meblağ-ı mezbûr iki yüz yetmiş guruşu yedinden tamâmen ahz u kabz eyledim. Ba‘de’l-yevm menzil-i mezkûrda benim ve müvekkilûn-ı merkûmûnun bir vechile alâka ve medhalimiz kalmayıp, ebniyesi mezbûre Fâtıma Hâtun’un mülk-i müşterâsı ve arsası hakk-ı müfevvazı olmuşdur dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel sene 1102. Şuhûdü’l-hâl: es-Seyyid eş-Şeyh Efendi, Mehmed Efendi el-imâm, el-Hâc Mahmud b. ( ), tüfengî, Osman Bey [b.] Abdi, Bakkal İbrahim Beşe b. Ahmed, Ali Rıza b. Mehmed.