Bab Mahkemesi 54 Numaralı Sicil (H. 1102 / M. 1691) cilt: 20, sayfa: 133 Hüküm no: 121 Orijinal metin no: [19a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. Abdullah’ın Mehmed b. Abdullah’tan alacaklı olduğu Hâlâ şeyh-i meşâyihu’l-İslâm hazretlerinin telhîsciliği hizmetinde olan bâ‘isü hâze’l-kitâb Hasan Efendi b. Abdullah b. Abdurrahman tarafından husûs-ı âti’l-beyâna vekîl olduğu Ahmed Çelebi b. Mehmed ve Hasan b. Osman şehâdetleriyle şer‘an sâbit olan Hüseyin Efendi b. Bayram meclis-i şer‘-i şerîf-i enverde, vilâyet-i Anadolu’da Kütahya kazâsına tâbi‘ Tavşanlı nâm karye ahâlîsinden olup, vilâyet-i Rumeli’nde İlbasan kazâsında nâibü’ş-şer‘i’ş-şerîf iken bundan akdem vefât eden Hüseyin Efendi’nin babası olmağla terekesine vâzı‘u’l-yed olan Mehmed b. Abdullah nâm kimesne mahzarında, bi’l-vekâle üzerine da‘vâ ve takrîr-i kelâm edip, müvekkilim mezbûr Hasan Efendi mukaddemâ mezbûr diğer Hüseyin Efendi’ye yirmi beş guruş ikrâz ve teslîm, ol dahi iktirâz ve kabz edip hattâ mukābelesinde ( ) rehin teslîm, ol dahi irtihân ve kabz eyledikden sonra ve yine [meblağ-ı] mezbûru kable’l-edâ merkūm Hüseyin Efendi fevt olup, tereke-i vâfiyesin babası mezbûr Mehmed kabz etmeğin, hâlâ suâl olunup tereke-i vâfiyesinden bi’l-vekâle bana edâya tenbîh olunması matlûbumdur dedikde, gıbbe’s-suâl mezbûr Mehmed cevâbında, fi’l-hakīka tereke-i müteveffâ-yı mezbûra vaz‘-ı yedini ikrâr, lâkin deyn-i mezbûru inkâr edicek, vekîl-i mezbûrdan müdde‘âsına beyyine taleb olundukda, udûl-i müslimînden olup ( ) nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ müvekkil-i mezbûr Hasan Efendi müteveffâ-yı mezbûr Hüseyin Efendi b. Mehmed b. Abdullah’a mukaddemâ bizim huzûrumuzda yirmi beş esedî guruş ikrâz ve teslîm, ol dahi iktirâz ve kabz ve mukābelesinde eşyâ-i mezkûreyi rehin vaz‘ ve teslîm etmiş idi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olup ve müvekkil-i mezbûr meclis-i şer‘de tahlîf-i şer‘î ile tahlîf dahi olunmağın, mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel sene 1102. Şuhûdü’l-hâl: Ahmed Çelebi b. Mehmed, Hasan Beşe b. Osman, İbrahim Çelebi b. Ahmed, Mehmed Çelebi (...).