Bab Mahkemesi 54 Numaralı Sicil (H. 1102 / M. 1691) cilt: 20, sayfa: 134 Hüküm no: 122 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ali’nin yarım menzil hissesini İsmail Çelebi b. Halil’e satması Mahmiye-i İstanbul’da Akşemseddin mahallesinde sâkine olup zâtı Abdullah b. Mustafa ve Halil b. Mustafa nâm kimesneler ta‘rîfleriyle mu‘arrefe olan Ayşe bt. Ali nâm hâtun meclis-i şer‘-i şerîf-i enverde, dâmâdı bâ‘isü hâze’l-kitâb İsmail Çelebi b. Halil nâm kimesne mahzarında ikrâr ve takrîr-i kelâm edip, silk-i mülkümde münselik olup mahalle-i mezbûrede vâki‘ bir tarafdan el-Hâc Mehmed mülkü ve bir tarafdan ba‘zan Fâtıma ve ba‘zan evlâda meşrûta vakıf menzil ve Ayşe Hâtun mülkü ve bir tarafdan İbrahim Çavuş’un tasarrufunda olan vakıf menzil ve bir tarafdan tarîk-i âm ile mahdûd fevkānî iki oda ve iki sofa ve tahtânî iki oda ve bir matbah ve bir kuyu ve bahçe ve havluyı müştemil mülk menzilimin nısf-ı şâyi‘ini, mezbûr İsmail Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile dört yüz guruşa bey‘ ve teslîm, ol dahi iştirâ ve tesellüm ettiğinden sonra semeni olan meblağ-ı mezbûr dört yüz guruşu hîbetü’d-deyn mimmen aleyhi’d-deyn fehvâsınca, mezbûr İsmail Çelebi’ye hibe-i sahîha ile hibe ve temlîk, ol dahi meclis-i hibede ittihâb ve kabûl ve temellük eyledi. Ba‘de’l-yevm menzil-i mezkûrun nısf-ı şâyi‘i mezbûr İsmail Çelebi’nin mülk-i müşterâsıdır. Keyfe mâ yeşâ mutasarrıf olsun dedikde, gıbbe’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Halil Çelebi b. Mustafa, Abdullah Çelebi b. Mustafa, Hasan Çelebi b. ( ), Abdullah Efendi hazretleri el-imâm, Fahrü’l-kuzât Şaban Efendi, Siyavuş Bey b. ( ), Abdi Çelebi b. ( ).