Bab Mahkemesi 54 Numaralı Sicil (H. 1102 / M. 1691) cilt: 20, sayfa: 134 Hüküm no: 123 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın boşandığı kocası Ahmed b. Mustafa’dan alacağını tahsil ettiği Dârü’l-hilâfeti’l-aliyye Kostantıniyye el-mahmiye’de sâkin Kürkçübaşı mahallesi sâkinelerinden Ayşe bt. Abdullah nâm hâtun tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Mesud Çelebi b. Receb ve el-Hâc Mehmed b. Mustafa nâm kimesneler şehâdetleriyle şer‘an sâbit olan İbrahim Çelebi b. Mehmed nâm kimesne meclis-i şer‘-i şerîf-i enverde, müvekkile-i mezbûrenin zevc-i mutallıkı Ahmed b. Mustafa nâm kimesne mahzarında bi’l-vekâle ikrâr-ı tâm ve takrîr-i kelâm edip, müvekkilim mezbûre Ayşe’yi merkūm Ahmed bundan akdem bâyinen tatlîk, ol dahi mezbûr Ahmed zimmetinde mütekarrir ve ma‘kūdun-aleyh olan iki bin akçe mehr-i müeccelini ve bi’t-terâzî ta‘yîn olunan dört yüz akçe nafaka-i iddetini taleb eylediğinde, beynlerinde nizâ‘-ı küllî vukū‘undan sonra muslihûn tavassut edip, da‘vâ-yı mezkûresinden müvekkilim mezbûreyi mezbûr Ahmed ile bin beş yüz akçe üzerine sulh eylediklerinde, ol dahi sulh-ı mezbûru kabûl ve bedel-i sulh olan meblağ-ı mezbûr bin beş yüz akçeyi merkūm Ahmed yedinden bi’t-tamâm ve’l-kemâl ahz u kabz edip, husûs-ı mezbûra müte‘allika âmme-i da‘vâ ve münâza‘âttan ve eymân ve muhâsamâtdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde, gıbbe’t-tasdîki’l-mu‘teberi’l-vicâhî işbu vesîka-i enîka bi’t-taleb ve’l-ibtiğā ketb olundu. Fî gurreti Cumâdelâhire li sene isneteyn ve mi’e ve elf. Şuhûdü’l-hâl: Mesud Efendi b. Receb İmâm-ı Kürkçübaşı, Attâr Osman Çelebi b. ( ), Haffâf Mehmed Çelebi b. ( ), el-Hâc Mehmed b. ( ), İbrahim Çelebi b. el-Hâc Ahmed, Mustafa b. Şaban, Köse el-Hâc Ali.