Bab Mahkemesi 54 Numaralı Sicil (H. 1102 / M. 1691) cilt: 20, sayfa: 135 Hüküm no: 124 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Mehmed’in Ali Çelebi b. İbrahim’den muhâlaa yoluyla boşanması Mahmiye-i İstanbul’da Hızır Bey mahallesi sâkinelerinden olup zâtı ma‘rifet-i şer‘iyye ile ârifân olan İmâm İsmail Efendi b. Mustafa [ve] İbrahim Çelebi b. Mehmed nâm kimesneler ta‘rîfleriyle mu‘arrefe olan Rukiye bt. Mehmed nâm hâtun meclis-i şer‘-i şerîf-i enverde ve mahfil-i dîn-i münîf-i ezherde, zevc-i dâhili bâ‘isü hâze’l-kitâb Ali Çelebi b. İbrahim nâm kimesne mahzarında ikrâr ve takrîr-i kelâm edip, zevcim mezbûr Ali Çelebi zimmetinde mütekarrir ve ma‘kūdun aleyh olan altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Ali Çelebi ile muhâla‘a-i sahîha-i şer‘iyye ile muhâla‘a edip, ol dahi hul‘-ı mezbûru kabûl ettiğinden sonra hukūk-ı zevciyyete müte‘allika da‘vâdan her birimiz âharın zimmeti ibrâ-i âmm-ı kātı‘ü’n-nizâ‘la ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cumâdelâhire sene 1102. Şuhûdü’l-hâl: İmâm İsmail Efendi b. Mustafa, İbrahim Çelebi b. Mehmed, Hüseyin Çelebi b. Mustafa, Mehmed Çelebi b. Muharrem.