Bab Mahkemesi 54 Numaralı Sicil (H. 1102 / M. 1691) cilt: 20, sayfa: 135 Hüküm no: 125 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Kenan’ın verâset işleri için Hacı Maksud’u vekil tayin etmesi Mahmiye-i İstanbul’da Molla Hüsrev mahallesi sâkinelerinden olup zâtı ma‘rifet-i şer‘iyye ile ârifân Mustafa b. İbrahim ve Halil b. İbrahim ta‘rîfleriyle mu‘arrefe olan Fâtıma bt. Kenan nâm hâtun meclis-i şer‘-i şerîf-i enverde, bâ‘isü hâze’l-kitâb el-Hâc Maksud nâm kimesne mahzarında ikrâr ve takrîr-i kelâm edip, li ebeveyn er karındaşım olup, Dergâh-ı âlî yeniçerilerinin yüz birinci odada iken Girit cezîresinde bundan akdem vefât eden Mehmed Odabaşı’nın verâseti [20a] bana münhasıra olmağla, cezîre-i mezbûrede müteveffâ-yı mezkûrun terekesini kabz eden yeniçeri beytülmâl emîni Keştî Ahmed Ağa’dan ve sâir vâzı‘-ı yed olanlardan taleb ve da‘vâ ve ahz u kabz ve bana îsâle mütevakkıf olduğu umûrun küllîsine mezbûr el-Hâc Maksud’u tarafımızdan vekîl ve nâib-i menâb nasb ve ta‘yîn ettim dedikde, mezbûr el-Hâc Maksud dahi ve vekâlet-i mezbûreyi kabûl ve merâsimin edâya ta‘ahhüd etmeğin, mâ vaka‘a bi’t-taleb ketb olundu. Fi’l-yevmi’s-sânî min Cumâdelâhir sene 1102. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Ebûbekir b. Hüseyin, Ali b. Veli.