Bab Mahkemesi 54 Numaralı Sicil (H. 1102 / M. 1691) cilt: 20, sayfa: 136 Hüküm no: 126 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mehmed’in Receb Beşe b. Şaban’dan muhâlaa yoluyla boşanması Mahrûse-i Galata’ya tâbi‘ kasaba-i Tophâne’de Perviz Ağa mahallesinde sâkine Sâliha bt. Mehmed nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde ve mahfil-i dîn-i münîf-i ezherde, zevc-i dâhili bâ‘isü hâze’l-kitâb Receb Beşe b. Şaban nâm kimesne mahzarında ikrâr ve takrîr-i kelâm edip, zevcim mezbûr Receb Beşe zimmetinde mütekarrir ve ma‘kūdun-aleyh olan altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve mezbûrun firâşından hâsıl ve benden mütevellid sadrî sagīr oğlum Mustafa’yı yedi yaşına değin kendi mâlımdan infâk ve iksâ etmek üzre ve me’ûnet-i süknâm dahi kendi üzerime olmak üzre zevcim mezbûr Receb Beşe ile muhâla‘a-i sahîha-i şer‘iyye ile muhâla‘a edip, ol dahi hul‘-ı mezbûru kabûl ettiğinden hukūk-ı zevciyyete müte‘allika da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cumâdelâhire sene 1102. Şuhûdü’l-hâl: Hasan Beşe b. Mehmed, Ali Beşe b. Ebûbekir, Mehmed Beşe b. Ali, Mahmud Beşe b. Hasan.