Bab Mahkemesi 54 Numaralı Sicil (H. 1102 / M. 1691) cilt: 20, sayfa: 136 Hüküm no: 127 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. İbrahim’in menzilini Ahmed Çelebi b. Mahmud’a satması Mahmiye-i İstanbul’da el-Hâc İsâ mahallesi sâkinelerinden olup zâtını ma‘rifet-i şer‘iyye ile ârifân Hüseyin Çelebi b. Abdullah ve el-Hâc Ahmed b. Abdullah ta‘rîfleriyle mu‘arrefe olan Fâtıma Hâtun bt. İbrahim meclis-i şer‘-i şerîf-i enverde, işbu râfi‘ü’l-kitâb Ahmed Çelebi b. Mahmud nâm kimesne mahzarında ikrâr-ı tâm ve takrîr-i kelâm edip, ferâğ-ı âti’z-zikrin sudûruna değin merhûm İskender Paşa Vakfı’ndan icâre-i mu‘accele ve her mâh on iki akçe ücret-i müeccele ile taht-ı tasarrufumda olup, mahmiye-i mezbûrede Hızır Çavuş mahallesinde vâki‘ bir tarafı Câbî İsmail menzili ve bir tarafı Kuloğlanı Mustafa menzili ve bir tarafı Yahudihâne ve bir tarafı tarîk-i hâss ile mahdûd fevkānî oda ve bir tahtânî oda ve kenîfi müştemil mülk menzilimi, bâ-izn-i mütevellî merkūm Ahmed Çelebi’ye altı bin akçe bedel mukābelesinde ferâğ ve tefvîz edip, ol dahi tefevvüz ve kabûl eyledikden sonra bedel-i ferâğ olan meblağ-ı mezbûr altı bin akçeyi yedinden ahz u kabz eyledim. Fîmâ ba‘d menzil-i mahdûd-ı merkūm mezbûr Ahmed Çelebi’nin dâhil-i havza-i tasarrufu olmuşdur. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî fî Cumâdelâhire sene 1102. Şuhûdü’l-hâl: Hüseyin Çelebi b. Abdullah, İbrahim Çelebi b. Mahmud, İbrahim Efendi b. Osman, İbrahim Çelebi b. Ahmed, Mustafa Çelebi b. İsmail, Yahya b. Hasan, Abdülkerim b. Hasan, Ahmed b. Mehmed.