Bab Mahkemesi 54 Numaralı Sicil (H. 1102 / M. 1691) cilt: 20, sayfa: 137 Hüküm no: 128 Orijinal metin no: [20a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ali’nin menzilini Hacı İbrahim b. Hacı Mehmed’e satması Mahmiye-i İstanbul’da Neslişah Sultan mahallesinde vâki‘ bir tarafı Hüseyin Ağa Bostanı ve bir tarafı Ali Beşe mülkü ve bir tarafı Ahmed Efendi mülkü ve bir tarafı tarîk-i hâs ile mahdûd fevkānî iki oda ve iki sofa ve dehliz ve tahtânî üç oda ve bir ahır ve bir kenîf ve zât-ı eşcâr bahçe ve bi’r-i mâyı müştemil mülk menzilin nısfı Fâtıma bt. Ali nâm hâtunun mülkü ve nısf-ı âharı zevci Mehmed b. Hasan nâm kimesnenin mülkü olup, fevt oldukda menzil-i mezbûrda olan nısf hissesi sekiz sehim i‘tibâr olundukda, bir sehmi zevcesi mezbûre Fâtıma’ya ve dört sehmi oğlu kızı Emetullah bt. Ali nâm sagīreye ve üç sehmi karındaşı Mustafa’ya isâbet edip, mezbûr Mustafa menzil-i mezbûrda olan hisse-i irsiyesin semen-i makbûza mezbûre Fâtıma Hâtun’a bey‘ ve teslîm eylediği lede’ş-şer‘i’l-enver sâbit ve mütehakkik oldukdan sonra mezbûre Fâtıma Hâtun ba‘de’t-ta‘rîfi’ş-şer‘î meclis-i şer‘-i şerîf-i lâzımü’t-tevkīrde, işbu bâ‘isü’l-kitâb el-Hâc İbrahim b. el-Hâc Mehmed mahzarında bi tav‘ihâ ikrâr-ı sahîh-i şer‘î ve i‘tirâf-ı sarîh-i mer‘î kılıp, bâlâda hudûdu ve müştemilâtı ketb ve terkīm olunan menzil-i merkūmda olan mecmû‘ hissemi cemî‘ tevâbi‘ ve levâhıkı ve kâffe-i hukūk ve merâfıkı ile mezbûr el-Hâc İbrahim’e yüz seksen dört esedî guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr yüz seksen dört esedî guruşu mezbûr el-Hâc İbrahim yedinden bi’t-tamâm ve’l-kemâl ahz u kabz ve tesellüm eyledim. Ba‘de’l-yevm mecmû‘-ı menzil-i mezbûrda olan hissem mezkûr el-Hâc İbrahim’in mülk-i müşterâsıdır. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mezbûre Emetullah’ın dayısı ve tesviye-i umûru için kıbel-i şer‘den mansûb vasîsi olan el-Hâc Mehmed b. el-Hâc Mehmed meclis-i şer‘de, mezbûr el-Hâc İbrahim mahzarında bi’l-vesâye ikrâr-ı tâm ve takrîr-i kelâm edip, mezbûre Fâtıma menzil-i mezbûrda olan hissesini bey‘ ile sagīre-i mezbûrenin hissesi (...) kalıp ve hattâ harcına vefâ etmemekle hisse-i mezkûresi bey‘ ve semeni istirbâh olunup, (...) sarf olunmak lâzım ve mühim olmağla, ben dahi vesâyet-i mahkiyem hasebiyle zikr olunan (...) sagīre-i mezbûrenin birkaç hissesin semen-i mislinden ezyed olan bin dokuz yüz esedî akçeye mezbûr el-Hâc İbrahim’e bey‘ ve teslîm, [20b] ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûru yedinden bi’t-tamâm alıp kabz eyledim. Hisse-i mezbûre dahi merkūm el-Hâc İbrahim’in mülk-i müşterâsıdır mutasarrıf olsun dedikde, gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fî gurreti Cumâdelâhire li sene isneteyn ve mi’e ve elf. Şuhûdü’l-hâl: El-Hâc Siyavuş b. Abdullah, Hasan Çelebi b. Hüseyin, Osman Ağa b. Mustafa, el-Hâc Mehmed b. Yusuf, Mustafa Çelebi b. Abdullah.