Bab Mahkemesi 54 Numaralı Sicil (H. 1102 / M. 1691) cilt: 20, sayfa: 138 Hüküm no: 129 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa Ağa b. Hüseyin’in varislerinin terekenin paylaşımında birbirlerinin zimmetlerini ibra ettikleri Mahmiye-i İstanbul’da Mimar Sinan mahallesinde sâkin iken bundan akdem vefât eden el-Hâc Mustafa Ağa b. Hüseyin b. Mahmud’un verâseti, zevce-i metrûkesi Gevher Hâtun bt. Şerif Abdullah ve sulbiye kebîre oğulları Mehmed Çelebi ve Ahmed Çelebi’ye sulbiye kebîre kızı Hatice Hâtun’a münhasıra olduğu şer‘an mütehakkik oldukdan sonra mezbûretân Gevher ve Hatice taraflarından husûs-ı âti’l-beyâna vekîl olduğu zâtlarını ma‘rifet-i şer‘iyye ile ârifân el-Hâc İbrahim b. Abdullah ve Hüseyin Çelebi b. Ahmed şehâdetleriyle şer‘an sâbit olan mezbûre Hatice’nin zevci Halil Çelebi b. İbrahim meclis-i şer‘-i şerîfde, merkūm Mehmed Çelebi mahzarında ikrâr-ı tâm ve takrîr-i kelâm edip, merkūm el-Hâc Mustafa Ağa’nın zimem-i nâsda olan hukūkundan Hüseyin? nâm kimesneden iki yüz guruş …? İbrahim’den kırk sekiz guruş ve Dervişoğlu’ndan otuz guruş ve karye-i Öksüzlü ahâlîsinden dört bin akçe ve Aslan nâm zimmîden iki yüz otuz guruş cem‘an merkūmûndan altmış dört bin dokuz yüz altmış akçeyi merkūm Mehmed Çelebi ahz u kabz ve istîfâ ettiğinden sonra meblağ-ı mezbûr altmış dört bin dokuz yüz altmış akçeden müvekkiletân-ı mezbûretânın hisselerine isâbet eden on dokuz bin dört yüz seksen sekiz akçeyi müvekkiletân-ı mezbûretâna def‘ ve teslîm, onlar dahi yedinden tamâmen ahz u kabz edip, min ba‘d meblağ-ı mezbûrdan merkūm Mehmed Çelebi zimmetinde bir akçe ve bir habbe hakları bâkī kalmamakla, husûs-ı mezbûra müte‘allika âmme-i da‘vâdan mezbûr Mehmed Çelebi’nin zimmetini ibrâ-i âm ile ibrâ ve iskāt eylediler dedikde, gıbbe’t-tasdîki’l-vicâhî mâ vaka‘a bi’t-taleb ve’l-ibtiğā ketb ve imlâ olundu. Fi’l-yevmi’s-sâmin min Cumâdelâhire li sene isneteyn ve mi’e ve elf. Şuhûdü’l-hâl: es-Seyyid Abdullah Efendi b. Abdurrahman, el-Hâc İbrahim b. Abdi, Halil Çelebi b. İbrahim, Molla Mehmed b. Ali, Mustafa Efendi b. Piyâle, Yazıcı Hasan b. Ahmed.