Bab Mahkemesi 54 Numaralı Sicil (H. 1102 / M. 1691) cilt: 20, sayfa: 139 Hüküm no: 130 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mehmed’in Sultan Bayezid Vakfı’na borçlu olduğu Mahmiye-i İstanbul’da Sultan Bayezid Hân -aleyhi’r-rahmetü ve’l-gufrân- hazretlerinin binâ eylediği câmi‘-i şerîfin evkāfına bi’l-fi‘il câbî olan Mustafa Çelebi b. Abdurrahman meclis-i şer‘-i şerîf-i enverde bundan akdem Akşemseddin mahallesinde sâkine iken vefât eden el-Hâc İsmail b. Hasan nâm kimesnenin sulbî sagīr oğlu İsmail ile sulbiye sagīre kızı Rahime’ye kıbel-i şer‘den mansûb vasîleri olan bâ‘isü hâze’l-kitâb Ahmed Çelebi b. Mehmed mahzarında üzerine da‘vâ ve takrîr-i kelâm edip, müteveffâ-yı mezbûrun sagīrlerine irsen intikāl eden Karabaş mahallesinde vâki‘ beyne’l-ahâlî ve’l-cîrân ma‘lûmü’l-hudûd bir bâb menzilden vakf-ı mezbûra senede yedi akçe mukāta‘a ve Akşemseddin mahallesinde vâki‘ ma‘lûmü’l-hudûd bir bâb menzilden on iki akçe ve yine Akşemseddin mahallesinde vâki‘ diğer menzilden bin yüz elli akçe mezbûr Ahmed Çelebi’den vefâtı hasebiyle vakf-ı mezbûr için taleb eylediğimde, bana edâdan imtinâ‘ eder suâl olunup meblağ-ı mezbûr bin yüz elli akçenin vakf-ı mezbûr için alıverilmesi matlûbumdur dedikde, gıbbe’s-suâl mezbûr Ahmed Çelebi cevâbında, kaziyye minvâl-i muharrer üzre olup ve vakf-ı mezbûr için ve her sene kırk yedişer akçeden yalnız altı senede müctemi‘ olan bin yüz elli akçeyi bi tav‘ihî ikrâr ve i‘tirâf etmeğin, alâ mûcebi i‘tirâfihî meblağ-ı mezbûr bin yüz elli akçeyi vakf-ı mezbûr için câbî-i mezbûr Mustafa Çelebi’ye edâ ve teslîme, vasiyy-i mezbûr Ahmed Çelebi’ye ba‘de’l-hükm ve’t-temlîk bi’t-taleb ketb olundu. Fî selhi Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Şaban Çelebi b. Ali, Mahmud Dede b. Ahmed, Ahmed b. Mehmed, Ali b. Bâli.