Bab Mahkemesi 54 Numaralı Sicil (H. 1102 / M. 1691) cilt: 20, sayfa: 140 Hüküm no: 131 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Receb’in iyi ahlâk sahibi olduğu ve eşi Nâime bt. Ahmed’e bakmaya iktidarı bulunduğu Mahmiye-i İstanbul’da Hızır Bey mahallesinde sâkine Nâime bt. Ahmed nâm hâtun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Hızır ve Ebûbekir Çelebi b. Hüseyin şehâdetleriyle vekâlet-i sâbite olan mezbûrenin karındaşı Abdülaziz Çelebi meclis-i şer‘-i şerîf-i enverde, işbu bâ‘isetü’l-kitâb mezbûre Nâime Hâtun’un zevc-i dâhili el-Hâc Mehmed b. Receb’e mahzarında takrîr-i kelâm ve ta‘bîr ani’l-merâm edip, mezbûr el-Hâc Mehmed müvekkile-i mezbûreyi infâk ve iksâ etmeğe kudreti olmadığından mâ‘adâ cevr ve eziyetden hâli değildir, keyfiyet-i ahvâli ahâlî-i mahalle-i mezbûra suâl olunmak matlûbumdur dedikde, taraf-ı şer‘den irsâl olunan Ziyaeddin Efendi b. Halil mahalle-i mezbûreye varıp, ahâlîsinden el-Hâc İsmail Efendi b. Mustafa ve Ahmed Çelebi b. Mustafa ve İhsan Bey b. Veli ve Hasan b. Veli ve Veli Beşe b. Süleyman ve es-Seyyid Mustafa Efendi b. Mustafa ve Muhyiddin Halîfe [b.] Şükrullah ve Ahmed [b.] İbrahim ve İvaz [b.] Himmet nâm kimesnelerden mezbûr el-Hâc Mehmed’in keyfiyet-i ahvâlini suâl eyledikde, mezbûr el-Hâc Mehmed zevce-i mezbûresini infâk ve iksâ etmeğe iktidârı vardır, hüsn-i hulk sâhib-i eyü âdemdir deyu mezbûrun hüsn-i hâlini müslimîn-i mezkûrûna haber verdiklerin mevlânâ-yı mezbûr mahallinde ketb ü tahrîr, ba‘dehû ma‘an ba‘s olunan Şaban [b.] Ali ile meclis-i şer‘a gelip, alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Ebûbekir b. Hüseyin, Osman b. Ali, Ali b. Bâli ve gayruhüm.