Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 302 Hüküm no: 336 Orijinal metin no: [58b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oskohi bt. Sefer’in vefat eden eşinden intikal eden hissesini borçlulardan tahsil etmek üzere vekil tayini Vilâyet-i Anadolu’da Erzurum kazâsı re‘âyâsından olup mahmiye-i İstanbul’da Samatya kurbünde mütemekkin iken bundan akdem hâlik olan David v. Fedan v. Adam zimmînin verâseti zevce-i metrûkesi Oskohi bt. Sefer Nasrâniye ile ammi oğlu? [59a] Minas v. Gaspar zimmî v. Adam zimmîye münhasıra ve terekesinin rub‘u zevcesi mersûme Oskohi Nasrâniyeye ve bâkī selâse-i erba‘ı ammi oğlu mersûm Minas zimmî’ye inhisârı tahakkukundan sonra mersûm Minas zimmî tarafından ber-vech-i âtî vekâlet iddi‘â eden işbu hâmiletü’r-rakīm mersûme Oskohi Nasrâniye meclis-i şer‘-i hatîr-i lâzımü’t-tevkīrde Kigork v. Artin zimmî muvâcehesinde üzerine da‘vâ ve takrîr-i kelâm edip zevcim mersûm David zimmînin mersûm Kigork zimmî zimmetinde cihet-i karzdan elli guruş alacak hakkı olup kable’l-ahz ve’l-istifâ hâlik ve meblağ-ı mezbûr tashîh-i mezkûr üzere benimle ammi oğlu mersûm Minas zimmîye mevrûs olmağla mersûm Minas zimmî meblağ-ı mezbûrdan hissesini mersûm Kigork zimmîden ve sâir zimem-i nâsda olan hukūkundan kezâlik ber-tashîh-i mezkûr hissesini erbâbından taleb ve da‘vâ ve ahz ü kabza ve hâlik-i mersûmun düyûnunu edâya bundan akdem beni tarafından şühûd muvâcehelerinde vekîl nasb ü ta‘yîn eylediğinde ben dahi vekâlet-i mezkûreyi kabûl etmemle meblağ-ı mezbûr elli guruşu verâset-i mahkiyem ve vekâletim hasebiyle taleb ederim suâl olunsun dedikde gıbbe’s-suâl, mersûm Kigork zimmî dahi cevâbında hâlik-i mersûm David zimmîye sağlığında karzdan zimmetinde elli guruş deyni olduğu ve hâlik-i mersûmun verâseti zevcesi mersûme Oskohi Nasrâniye ile ammi oğlu mersûm Minas zimmîye münhasıra olduğunu ikrâr, mersûme Oskohi Nasrâniyenin vekâleti ma‘lûmum değildir deyü inkâr edicek müdde‘iye-i mersûmeden ber-vech-i muharrer vekâlet müdde‘âsına mutâbık beyyine taleb olundukda ahrâr-ı ricâl-i Nasârâdan Asvador v. Abraham ve Avadis v. Markar zimmîler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka hâlik-i mersûm David v. Fedan v. Adan zimmînin mersûm Kigork zimmî zimmetinde sağlığında cihet-i karzdan elli guruş alacak hakkı olup kable’l-ahz ve’l-istifâ hâlik ve meblağ-ı mezbûr zevcesi mersûme Oskohi bt. Sefer Nasrâniye ile ammi oğlu mersûm Minas v. Gaspar v. Adam zimmîye mevrûs olup ve meblağ-ı mezbûrdan mersûm Minas zimmî ber-tashîh-i mezkûr hissesini mersûm Kigork zimmîden ve sâir zimem-i nâsda zuhûr eden hukūkundan kezâlik ber-tashîh-i mezkûr hisse-i irsiyesini erbâbından taleb ve da‘vâ ve ahz ü kabza ve makbûzundan hâlik-i mersûmun düyûnunu edâya bundan akdem bizim <> muvâcehemizde şahsını rü’yetimiz ile ma‘lûmumuz olan işbu müdde‘iye-i mersûme Oskohi Nasrâniyeyi tarafından vekîl nasb ü ta‘yîn eylediğinde ol dahi ber-vech-i muharrer vekâlet-i mezkûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri müttefikü’l-lafz ve’l-ma‘nâ edâ-yı şehâdet-i şer‘iye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mersûme Oskohi Nasrâniye meclis-i şer‘de Asvador v. Abraham ve Avadis v. Markar zimmîler muvâcehelerinde bi’l-asâle ve bi’l-vekâle ve bi’l-verâse takrîr-i kelâm ve ta‘bîr ani’l-merâm edip mûrisim oğlum hâlik-i mersûmun ma‘lûmü’l-esâmî kimesneler zimmetlerinde bâ-defter-i müfredât ma‘lûmü’l-mikdâr alacağı olup ve ben bu esnâda diyâr-ı âhara gitmek murâd etmemle ma‘lûmü’l-esâmî kimesneler zimmetlerinde zuhûr eden hukūkunu erbâbından taleb ve da‘vâ ve ahz ü kabza ve makbûzunu bana teslîme tarafımdan mersûmân Asvador ve Avadis zimmîleri vekîl nasb ü ta‘yîn eyledim dedikde <> onlar dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd etmeleriyle mâ-vaka‘a [bi’t-taleb ketb olundu.] Fî 5 B sene [1]242. Şühûdü’l-hâl: Ali Çelebi el-muhzır, Ebûbekir Çelebi el-muhzır, Mehmed Çelebi el-muhzır, Emin Çelebi el-muhzır, Abdulfettah Çelebi el-muhzır.