.:: İstanbul Kadı Sicilleri ::.


Mahmudpaşa Mahkemesi 1 Numaralı Sicil (H. 1240-1242 / M. 1825-1827)
cilt: 91, sayfa: 304
Hüküm no: 337
Orijinal metin no: [59a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fatıma bt. Ahmed Arif’in eşi Seyyin Mustafa Nuri’den muhâlaa usulüyle boşanması

Bi’l-vekâle muhâla‘a hücceti,

Mahrûse-i Galata’ya muzâfe kasaba-i Kasımpaşa’da Hacı Ahmed mahallesinde sâkine Şerife Fatıma bt. Ahmed Ârif b. Ahmed nâm Hatun tarafından husûs-ı âti’l-beyânda vekîl olduğu zâtını ârifân Hasan b. Halil ve es-Seyyid Hüseyin b. Hasan şehâdetleriyle sâbit olan Molla Ahmed b. Hüseyin meclis-i şer‘-i şerîf-i enverde zevc-i muhâlı‘ı işbu bâ‘isü’l-vesîka es-Seyyid Mustafa Nuri b. Ahmed mahzarında bi’l-vekâle ikrâr-ı tam ve takrîr-i kelâm edip müvekkilem mezbûre Şerife Fatıma Hatun’un merkūm es-Seyyid Mustafa Nuri zevc-i dâhili olup lâkin beynlerinde hüsn-i mu‘âşeretleri olmayıp ve merkūm es-Seyyid Mustafa Nuri müvekkilem mezbûreyi hîn-i tezevvücünde mehr-i mu‘accel tesmiye olunan bâ-defter-i müfredât eşyâ-yı ma‘lûmenin kıymeti olan yedi yüz guruşdan bâkī iki yüz guruş ile zimmetinde mütekarrir ve ma‘kūdün-aleyh olan üç yüz bir guruş mehr-i müecceli ve nafaka-i iddeti ve meûnet-i süknâsı üzerine olmak üzere müvekkilem mezbûreye izâfetle zevc-i merkūm es-Seyyid Mustafa Nuri ile bi’l-vekâle muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetden işbu târih-i vesîkaya gelince sâir beynlerinde cereyân eden cemî‘ hukūk-ı şer‘iyeye müte‘allika âmme-i da‘vâdan her birimiz âharın zimmetin bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.]

Fî 12 B sene [1]242.

Şühûdü’l-hâl: Muhzır Ali Çelebi, Muhzır Emin Çelebi, Muhzır Fettah Çelebi.