Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 304 Hüküm no: 338 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hürmüza bt. Mehmed’in menzilini müştemilatıyla beraber Emine bt. Mehmed’e satması Menzil mübâya‘ası, 800 guruş Mahmiye-i İstanbul’da Hâcekadın Hamamı kurbünde Hızır Bey mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Nefise Hürmüza bt. Mehmed nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Emine bt. Mehmed nâm hatun mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye müstakılleten yedimde mülk ve hakkım olup mahalle-i mezbûrede vâki‘ bir tarafdan Düğmeci Mustafa menzili ve bir tarafdan Şah Cihan Hatun menzili ve bir tarafdan Tuvanlı Çeşme ve bir tarafdan tarîk-i âm ile mahdûd iki oda ve iki sofa ve bir kenîf ve müştemilât-ı sâireyi hâvî bir bâb mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Emine Hatun’a sekiz yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr sekiz yüz guruşu müşteriye-i mezbûre bana def‘ ü teslîm ben dahi yedinden tamamen ahz ü kabz eyledim, fîmâ-ba‘d menzil-i mahdûd-ı mezkûr mezbûre Emine Hatun’un mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 11 B sene [1]242. Şühûdü’l-hâl: Muhzır Ebûbekir Çelebi, Muhzır Feyzullah Çelebi, İmâm-ı mahalle Hafız Mustafa Efendi, Muhzır İsmail Çelebi, Muhzır Ali Çelebi.