Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 305 Hüküm no: 339 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi Mehmed Ağa’nın aldığı borç karşılığında ipekçi odası gediğini rehin vermesi İdâne hücceti, 1450 Mahmiye-i İstanbul’da Edirnekapısı kurbünde sarmaşık mahallesinde sâkine İpekçi Mehmed Ağa b. Mustafa meclis-i şer‘-i şerîf-i enverde işbu bâ‘isetü’l-vesîka Şerife Tayyibe bt. es-Seyyid Mehmed Ârif b. Abdullah nâm hatun tarafından husûs-ı âti’l-beyânda vekîl olduğu zâtını ârifân es-Seyyid Osman b. es-Seyyid el-Hâc Mehmed ve Mustafa b. Abdurrahman şehâdetleriyle sâbit olan Ahmed b. Ebâbekir mahzarında ikrâr-ı tam ve takrîr-i kelâm edip müvekkile-i mezbûre Şerife Tayyibe Hatun bana malından vekîl-i merkūm yediyle bin guruş idâne ve teslîm ben dahi yedinden istidâne ve kabz edip meblağ-ı mezbûr bin guruş ile semeni târih-i kitâbdan üç sene tamamına değin müeccel ve mev‘ûd olmak üzere kezâlik müvekkile-i mezbûrenin malından vekîl-i merkūm yedinden iştirâ ve kabz eylediğim bir hilâlî sâ‘at semeninden dört yüz elli guruş ki ciheteyn-i mezkûreteynden cem‘an bin dört yüz elli guruş müvekkile-i mezbûreye zimmetimde vâcibü’l-edâ ve lâzımü’l-kazâ sahîhan deynim olmağla ben deynim olan meblağ-ı mecmû‘-ı mezbûr mukābelesinde mahmiye-i mezbûrede vâlide Hanı kurbünde Külhan Sokağı’nda vâki‘ Şakir Usta ve Ebûbekir Usta odaları beynlerinde kâin bir bâb ipekçi odası derûnunda mevcûde beyne’l-esnâf gedik ta‘bîr olunur hüccet-i şer‘iye yedimde müstakıllen emvâlim olan iki destgâh ve üç çıkrık ve bir çift mancınık ve sâir âlât-ı lâzıme-i ma‘lûmemi müvekkile-i [59b] mezbûre Şerife Tayyibe Hatun’a rehin vaz‘ ü teslîm, ol dahi yedimden irtihân ve kabz eyledikden sonra müvekkile-i mezbûre Şerife Tayyibe Hatun âlât-ı muharrere-i mezkûreyi li-ecli’l-isti‘mâl bana i‘âre ve teslîm, ben dahi yedinden isti‘âre ve kabz edip âlât-ı muharrere-i mezkûre hâlen yedimde âriyettir dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 9 B sene [1]242. Şühûdü’l-hâl: Muhzır Ebûbekir Çelebi, Muhzır İsmail Çelebi, Muhzır Ali Çelebi.